30 tamyzda elordadaǵy «Qazaq eli» monýmenti janyndaǵy bas alańda el Táýelsizdiginiń 20 jyldyǵy men Qazaqstan Respýblıkasy Konstıtýsııasynyń 16 jyldyǵyna arnalǵan áskerı parad ótedi. Oǵan qatysýǵa Astanaǵa barlyq garnızondardan ártúrli ásker túrleri men tekterinen, Qarýly Kúshterdiń óńirlik qolbasshylyqtarynan sarbazdar kelip jetti. Bul áskerı qyzmetshilerdi ýaqytsha shoǵyrlandyrý úshin 40-shy razezdegi 68665 áskerı bólimniń janynan dalalyq lager boı kóterdi. Daıyndyq kún saıyn ótkizilýde.
Shatyrly qalashyq qajetti ınfraqurylymmen qamtamasyz etilgen. Jaýyngerler úshin dalalyq ashana jasaqtalyp, úsh mezgil tamaqtandyrý uıymdastyrylǵan. Medısınalyq beketter men monsha jumys istep tur. Bir sózben aıtqanda, 170-ten astam shatyrdan turatyn bul jer shaǵyn qalaǵa uqsaıdy.
30 tamyzda Astana turǵyndary men qonaqtaryna tól áskerimizdegi qarý-jaraq pen jaýyngerlik tehnıka túrleri kórsetiletin bolady. Elorda aspanynda áskerı ushqyshtar joǵary pılotajdy qımyldar jasaıdy.
Áskerıler qazir óz sheberlikterin shyńdaý ústinde. Kúndelikti sap daıyndyǵy olardan túzý júrýdiń árbir mıllımetrlik esebin talap etedi. Osy aptadan bastap sarbazdar boıyndaǵy bes qarýymen sap daıyndyqtaryn jasaýǵa kiristi.
Otanshyl rýh pen patrıottyq sezimdi tý etken qazaqstandyq áskerı qyzmetshiler ózderine júktelgen jaýapkershilikti durys túsinedi. Olar ózderine qoıylǵan mindetterdi sátti oryndap shyǵatyndyqtaryna nyq senimdi.
Qazaqstan Respýblıkasynyń 20 jyldyǵyna arnalǵan paradqa áskerı qyzmetshiler úlken jaýapkershilikpen kelip otyr. Bul sekildi mańyzdy is-sharalarǵa ázirlik jaýyngerlerdiń sap daıyndyǵyn shyńdaı túseri anyq. Ári áskerler paradyna úzdikterdiń ǵana tartylatyny aqıqat.
Bıylǵy áskerı sherýdiń keń kólemde ári qyzyqty ótetinine senim bildirýge bolady. Sebebi, bul is-shara el táýelsizdiginiń jetistikterin pash etpek.
Oksana PARPÝRA, Qorǵanys mınıstrligi baspasóz qyzmetiniń qyzmetkeri.
Sýretterdi túsirgen Ermek SARBASOV.