Parlament Májilisiniń Tóraǵasy Oral Muhamedjanov eki kúndik jumys saparymen keshe Aqmola oblysyna kelgen bolatyn. Sapar maqsaty, jergilikti jerlerde zańdardyń qalaı jumys istep jatqanyn, osyǵan oraı adamdardyń pikirlerin bilý, sonymen qatar óńir halqy el Táýelsizdiginiń 20 jyldyǵyn qandaı kóńil-kúıde qarsy alatynyn baǵamdaý bolyp tabylady. Buǵan qosa, halyqtyń Parlamentpen keri baılanysyn jandandyryp, oǵan naqty is-qımyl berýge de basa nazar aýdarylmaq.
O.Muhamedjanov óziniń jumys saparyn oblystyń Shortandy aýdanynan bastady. Onda ol Baraev atyndaǵy astyq sharýashylyǵy ınstıtýtynda boldy. Astanalyq oblys Qazaqstannyń asa astyqty óńirleriniń biri bolyp tabylady. Kóptegen jetekshi tehnologııalar, daqyldardyń jańa túrleri osynda jasalady. Bıylǵy jyl Qazaqstan úshin dándi daqyldar turǵysynan alǵanda molshylyq jyly bolǵaly tur. Sondyqtan Májilis Tóraǵasy aldaǵy egin oraǵynyń strategııasy men taktıkasyna baılanysty ǵalymdardyń usynys-pikirlerin bilgisi kelgeni de anyq.
«Novokýbansk» jaýapkershiligi shekteýli seriktestiginde Oral Baıǵonysuly kúzgi jıyn-terin jumysyna daıyndyq barysymen tanysyp, «Baı Azat» jaýapkershiligi shekteýli seriktestiginde et óńdeý baǵytyndaǵy is-qımyldarǵa qyzyǵýshylyq tanytty jáne Shortandy kentindegi №3 orta mekteptiń pedagogıkalyq ujymymen júzdesti. Sondaı-aq, aýdan aktıviniń jumysyna qatysty.
Parlament Májilisi Tóraǵasynyń Bulandy aýdanynda bolý baǵdarlamasy da tyǵyzdyǵymen erekshelendi. Spıker «Nanar» mal sharýashylyǵy keshenin aralap, «Arna» jaýapkershiligi shekteýli seriktestiginiń jańa elevatoryn kórdi. Sonymen qatar, «Baldáýren» balalar baqshasynda, aýdandyq aýrýhanada boldy.
O.Muhamedjanov keshe keshkisin Zerendi aýdanyna kelip, onda dene shynyqtyrý-saýyqtyrý kesheni qurylysynyń barysymen tanysty.
Baqbergen AMALBEK, Aqmola oblysy.