Aqmola oblysy ákimdiginde óńir ákimi Marat Ahmetjanovtyń tóraǵalyǵymen «Oqjetpes» fýtbol klýbynyń qyzmetine qatysty jumys keńesi ótti. Iri aýyl sharýashylyǵy kásiporyndarynyń ókilderi kásibı sportty damytýǵa bıznestiń júıeli qatysý modelin qalyptastyrý máselelerin talqylady, dep habarlaıdy Egemen.kz.
Qazaqstan Respýblıkasy Prezıdentiniń kásibı sportty kezeń-kezeńimen kommersııalandyrý jáne klýbtardyń bıýdjet qarjylandyrýyna táýeldiligin azaıtý jónindegi tapsyrmalaryn iske asyrý aıasynda klýbty neǵurlym turaqty qarjylyq modelge kóshirý máseleleri qaraldy.
Qorytyndy boıynsha «Oqjetpes» FK qoǵamdyq qoryn qurý jóninde sheshim qabyldandy. Qordyń quryltaıshysy «Qazaqstannyń Eńbek Eri» ataǵynyń ıegeri, «Agrofırma «Rodına» JShS dırektory, Aqmola oblysynyń Qurmetti azamaty, elimizdiń agrarlyq sektorynyń bedeldi ókilderiniń biri Ivan Adamovıch Saýer bolady. Ol óńirdiń aýyl sharýashylyǵy taýaryn óndirýshilerimen birlesip, aqmolalyq fýtbolǵa júıeli qoldaý kórsetedi.
Osylaısha, «Oqjetpes» FK óńirlik bıznestiń qatysýymen jańa basqarý modeline kóshedi, al oblysta kásibı sportty bıýdjetten tys qarjylandyrýdyń júıeli tetigi qalyptasady.