Jetisý oblysynda óńirdiń ǵylymı jáne shyǵarmashylyq zııaly qaýym ókilderimen jańa Konstıtýsııa jobasy men aldaǵy respýblıkalyq referendýmǵa arnalǵan kezdesý ótti. Is-shara «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasy músheleriniń qatysýymen túsindirý dıalogy formatynda uıymdastyryldy, dep habarlaıdy Egemen.kz.
Kezdesýge Qazaqstan Respýblıkasy Premer-Mınıstriniń orynbasary – Mádenıet jáne aqparat mınıstri, koalısııa tóraǵasynyń orynbasary Aıda Balaeva qatysty.
О́z sózinde Aıda Balaeva jańa Konstıtýsııa jobasy el damýynyń jańa paradıgmasyn aıqyndaıtynyn atap ótti. Bul paradıgmada adam jáne onyń qadir-qasıeti aldyńǵy orynǵa shyǵyp, zııatkerlik áleýet strategııalyq resýrs retinde qarastyrylady.
«Jańa Konstıtýsııa jobasynyń negizgi máni - árbir azamattyń qadir-qasıetin qorǵaý jáne eldiń turaqty damýyn qamtamasyz etý. Eń bastysy, alǵash ret konstıtýsııalyq deńgeıde «bilim», «ǵylym» jáne «ınnovasııalar» memlekettiń joǵary qundylyqtary retinde bekitildi. Bul – bilimge, ǵylymı oıǵa jáne shyǵarmashylyq áleýetke naqty progress faktorlary retinde súıený degen sóz. Jańa tehnologııalar men jasandy ıntellekt dáýirinde básekege qabiletti bolý osy baǵyttarsyz múmkin emes», dedi ol.
Joba talqylaýynyń keń qoǵamdyq formatta ótkenine erekshe nazar aýdaryldy. Usynystar e-Otinish jáne eGov sıfrlyq platformalary arqyly qabyldanyp, Konstıtýsııalyq komıssııa jumysy ashyq júrgizilip, qoǵamdyq talqylaýlar tikeleı efırde kórsetildi.
«Burynǵy Konstıtýsııamyz 30 jyldan astam ýaqyt buryn, qıyn kezeńde qabyldandy. Al, qazirgi zaman talaby basqa – biz damý mindetterin aıqyndaýymyz kerek. Sondyqtan 10–20–30 jyl alǵa qarap, turaqty órkendeýdi qamtamasyz etip, balalarymyzǵa bolashaqta myqty memleket qaldyrýymyz qajet. Jańa Konstıtýsııa jobasy adamı kapıtaldyń basymdyǵyn, ǵylym men ınnovasııalarǵa súıenýdi, ultaralyq jáne konfessııaaralyq kelisimdi nyǵaıtýdy kúsheıtedi», dedi Májilis depýtaty Nıkıta Shatalov.
Adamı kapıtaldy damytý jáne kadr daıarlaý máselelerin Abaı atyndaǵy Qazaq ulttyq pedagogıkalyq ýnıversıtetiniń basqarma tóraǵasy – rektory Bolat Tilep kóterdi. Gýmanıtarlyq baǵytta «Halyqaralyq «Qazaq tili» qoǵamy» qoǵamdyq birlestiginiń Jetisý oblystyq fılıalynyń tóraǵasy Ámire Árin usynystaryn bildirdi. Al áńgimeniń mádenı qyryn Bıken Rımova atyndaǵy Qazaq drama teatrynyń kórkemdik jetekshisi Saǵyndyq Jumadil atap ótti.
Ámire Árin Konstıtýsııada bekitilgen negizgi qaǵıdattardyń memleket damýyna jáne eldiń halyqaralyq bedelin nyǵaıtýǵa yqpalyn erekshe atap ótti.
«Negizgi qujatta bekitilgen el men aýmaqtyń tutastyǵy, adam quqyqtary men bostandyqtary, zaıyrly memleket qaǵıdaty, sıfrlandyrý, neke, ádilettilik, zań men tártip, tabıǵatty qorǵaý sııaqty qaǵıdattardy ómirsheń dep sanaımyn. Osylaısha azamattyq qoǵamnyń memlekettik basqarýdaǵy róli artyp, memlekettik úderisterimiz damyp, elimizdiń álemdik qaýymdastyqtaǵy bedeli nyǵaıa túsedi», dedi ol.
Saǵyndyq Jumadil de Konstıtýsııada bekitilgen qaǵıdattardyń mańyzyn atap ótti.
«Táýelsizdik pen memlekettilik qundylyǵy da Konstıtýsııada aıqyn kórinis tapqan. Jerimizdiń tutastyǵy, shekaramyzdyń beriktigi, halyqtyń birligi – memlekettiń basty baılyǵy», dedi ol.
Kezdesý sońynda qatysýshylar aldaǵy referendýmda sanaly tańdaý jasaýdyń jáne ár azamattyń jeke jaýapkershiliginiń mańyzyn atap ótti. Konstıtýsııalyq normalar is júzinde jumys istep, memleket pen qoǵam arasyndaǵy senimdi nyǵaıtýy tıis ekeni aıtyldy.