Osydan jarty ǵasyr burynǵy: «Ataǵy joq Esenınder… jyn qysqan… Jańǵyrady jataqhana óleńi. Meniń jıyrma jasym muń qushqan… Tún ortasy… Kóshe boılap keledi. Jaýyndatyp keledi, Daýyldatyp keledi, Án-jyr keship keledi, Jańbyr keship keledi, Jelp-jelp etip jelegi, Meniń jıyrma jasym keledi...» – degen bozbala jyrdyń jetpistiń jalyna qol artqan shaǵyńda el tarapynan úlken qurmetpen oqylyp jatsa – aqyn retinde arqany keńge salýyńa tolyq negiz bar degen sóz. «Qazaqstan pıonerinen» Mádenıet mınıstrligine aýysarda gazettiń bas redaktory Farıza ápkesi qatty renjipti. Aıtpaǵy túsinikti, memlekettik qyzmet poezııańa keri áser etýi múmkin. Qazaq poezııasynyń padıshasyn alańdatqan da á degende súısinte kelgen óleńniń tazalyǵy bolsa kerek. О́leń men kógendi shatastyryp almaıtynyna sengeni shyǵar, aqyry rızashylyǵyn berip, shyǵaryp salypty. On tomdyqtyń tusaýkeserindegi saltanatty jıynda jazýshy Kádirbek Segizbaevtyń: «Men memlekettik qyzmette júrse de óndirip jazǵan, qos tizgindi teń ustaǵan eki adamdy bilemin. Biri – Ábish Kekilbaev, ekinshisi – osy Nurlan», – degen sózi de kóp nárseni ańǵartady. Aqyn, Jazýshylar odaǵy basqarma tóraǵasynyń birinshi orynbasary Ǵalym Jaılybaıdyń jıynnyń ashylýynda aıtqan: «Bıylǵy jyly Nurekeńniń qatarlary 70 jasqa kele bastady. Osy jyly qazaqtyń 38 belgili qalamgerleriniń mereıtoıy ótedi eken. Onyń ishinde ómirden ótkenderi de bar. Belınskıı Pýshkın jaıly jazǵan maqalasynda «Aqyndyq – ujymdyq qubylys. Ony orta tárbıeleıdi» degen oı aıtylady. Bul óte ras aıtylǵan. Bir qalamgerdi zerttep aıtý úshin onyń qatarlaryn qaraý kerek», – degen sózi de osydan shyqsa kerek. «An Arys» baspasynan shyqqan on tomdyq shyǵarmalar jınaǵy men Máskeýdiń «MIK» baspasy shyǵarǵan orys tilindegi kitaptyń tusaýkeserine arnalǵan kesh «Ǵarysh minezdi jyrlar» taqyrybynda ótti. О́leńder, pesalar, suhbattar men ár jyldary jazylǵan maqalalar men esseler engen jınaqtyń tusaýyn Qazaqstannyń halyq ártisi Sábıt Orazbaev, memleket jáne qoǵam qaıratkeri Keńes Aýhadıev, jazýshy, Memlekettik syılyqtyń laýreaty Sábıt Dosanov kesti. Jazýshylar odaǵy basqarma tóraǵasynyń orynbasary, «Qalamger-Medıa» ortalyǵynyń dırektory Janarbek Áshimjan júrgizgen keshte aqyn jaıly estelikter, quttyqtaý sózder az aıtylǵan joq. Maral Ysqaqbaı, Beksultan Nurjekeev, Kádirbek Segizbaev, Smaǵul Elýbaı, Shómishbaı Sarıev, Qýanyshbaı Qurmanǵalıev bastaǵan zamandastary on tomdyq eńbek Orazalın shyǵarmashylyǵynyń bir belesi ekenin, iriktelgen eńbek ekenin aıtty. Murat Áýezov «Izbrannoe» jınaǵyna engen óleńderdiń sapaly aýdarylǵanyna toqtaldy. Oljas Súleımenovtiń alǵy sózimen shyqqan jınaqqa engen óleńderdi S.Mnasakanıan, N.Chernova, V.Antonov, L.Shashkova, A.Matveev, Q.Baqbergenov, B.Jylqybaev, O.Janaıdarov syndy aýdarmashylar tárjimalaǵan. О́leńderiniń ózge tilde de túsinikti, tartymdy aýdarylǵanyn aqynnyń óz aýzynan da estidik. – О́z óleńińdi ózgeniń aýzynan tyńdap otyryp, keıde «osy óleńdi rasynda men jazyp pa edim?» degen bir sezim ıekteıdi. Bul on tomdyq bir jyldyń emes, meniń búkil ǵumyrymnyń, bar shyǵarmashylyǵymnyń jylnamasyndaı. О́tken jyldardyń bir esebi retinde osy on tomdyqty jetpis jyldyq mereıtoıǵa oraılastyryp, ózderińizge usynyp otyrmyn, – dedi Nurlan Myrqasymuly qorytyndy sózinde. T.Júrgenov atyndaǵy Qazaq ulttyq óner akademııasy «Sahna sózi» kafedrasynyń meńgerýshisi, professor, Qazaqstannyń eńbek sińirgen qaıratkeri Darıǵa Turanqulovanyń shákirtteri sahnalaǵan aqyn óleńderi keshtiń árin kirgize tústi. Ulttyq kitaphana qory Nurlan Orazalınniń ómiri men shyǵarmashylyǵyna arnalǵan kitap kórmesin uıymdastyrdy.
Almas NÚSIP, «Egemen Qazaqstan»
ALMATY