Boljam boıynsha Astanaǵa qalaaralyq kóliktermen 472 myńǵa jýyq adam keledi. Qazaqstannyń 13 oblysynan Elordaǵa kún saıyn 118 avtobýs qatynaıdy: qazir 53 qalaaralyq avtobýs baǵyttary bar bolsa, oǵan taǵy 65 qosylady. Ol úshin Astanada qosymsha «Alaı» jáne «KenMart» eki kólik haby quryldy.
– «Saparjaı» avtovokzaly qazirgi qalaaralyq jáne oblys aralyq 53 reıske qyzmet kórsetedi. «Alaı» haby arqyly 37,«KenMart» arqyly – 28 reıs qatynaıdy, - deıdi Astana qalasy jolaýshylar kóligi basqarmasynyń basshysy Bekmyrza Igenberdınov.
Qala turǵyndary men qonaqtaryn kórme nysandaryna jyldam jetkizý maqsatynda Astanada Shuttle Bus 7 baǵyt boıynsha 167 avtobýs qatynaıdy. Bir jolǵy jol júrý baǵasy - 150 teńge.
- Negizgi artyqshylyqtary: aıaldamalardyń sany az bolady, shamamen 8. Ekinshiden, aıaldamalar kórme qonaqtary kóp jınalǵan jerlerge ornalastyrylady, olar: qonaqúıler, vokzal jáne áýejaı. Bul mekemelerdiń janynda jeke kólikterin qoıatyn, EKSPO aýmaǵyna tez jetkizetin Shuttle Bus avtobýstaryna otyratyn arnaıy turaqtar bolady. Úshinshiden, atalǵan baǵyttaǵy avtobýstarǵa jolaýshylar aldyńǵy esikten kirip, jolaqysyn ózderi tóleıdi. Bul ásirese sheteldik qonaqtardyń kondýktorlarmen sóılesý kezinde tildik kedergi týyndamaý úshin qolaıly, - dep túsindirdi B.Igenberdınov.
Qazirdiń ózinde EKSPO-2017 kórmesiniń ortalyqtary arqyly 11 baǵyt boıynsha qoǵamdyq kólikter qatynaýda. Olarǵa 103 avtobýs qosyldy. Jolaqy quny ózgergen joq – 90 teńge. Sonymen qatar avtobýs parkterinde jańartý júrgizilip jatyr.
- Biz parkty barynsha jańartýǵa tyrysýdamyz. Qazirgi avtobýstarǵa qatysty eskertpeler bar. Kólikti qadaǵalaý qyzmeti qala avtobýstaryn turaqty baqylap otyrady ári aıtylǵan kemshilikter 1-maýsymǵa deıin joıylady. Qoǵamdyq kólik júrgizýshileri men kondýktorlary úshin jańa úlgidegi kıim qarastyrylýda. Sapany baqylaý ortalyǵy sheteldik qonaqtarmen qarym-qatynas boıynsha qyzmetkerlerge arnalǵan ádisteme daıyndady, - dedi basqarma basshysy.
Búgingi kúni qalada kún saıyn 350 myńǵa jýyq kólik qatynaıdy. Qazirdiń ózinde EKSPO aýmaǵy men Mega Silk Way OSO-nda 6 myńǵa tarta kólik qoıatyn oryn daıyndaldy. EKSPO kezeńinde kóshe-joldardaǵy qatynasty jeńildetý úshin arnaıy 14 turaq uıymdastyryldy. Olardyń birazy EKSPO aýmaǵyndaǵy jaıaý júrginshilerge arnalǵan jerlerde ornalastyryldy. Osyndaı turaqtar arqyly qalanyń basqa aýdandarynda Shuttle Bus avtobýs baǵyttary júredi. Maýsymnyń 3-nen bastap qalada uzyndyǵy 40,6 shaqyrymdy quraıtyn Bus Lane qosymsha 13 ýchaske iske qosylady.
- Qazirgi joldardaǵy kólikterdiń tym kóptigin eskere otyryp qoǵamdyq kólikter arqyly tyǵyryqtan shyǵýdyń jolyn tabýǵa bolady. Bus Lane jolaqtary boıynsha Shuttle Bus baǵytyndaǵy, qala avtobýstary, polıseıler, arnaıy qyzmet, jedel-járdem, qoǵamdyq kólikterge zańdyq negizde teńestirilgen taksı kólikteri qatynaı alady, - dedi Igenberdınov.
Sonymen qatar «Nurly jol» temirjol vakzalynan taǵy bir túngi ekspress-marshrýt iske qosylady. Maýsymnyń 7-inen 12-qyrkúıekke deıin tańerteńgi saǵat 6:00-den túngi 23:00 aralyǵynda júk kólikteriniń barlyq túrleri boıynsha qatynas toqtatylady. Jumys ýaqytyn saralaý jumystary da júrgizilýde. Qala basshylyǵynyń aıtýynsha, atalǵan sharalar Elorda joldaryndaǵy keptelisti azaıtyp, avtomobıl júrgizýshileri men jaıaý júrginshiler úshin qolaıly jaǵdaı týǵyzýǵa septigin tıgizedi.