Búgin Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıinde 16 jeltoqsan – Qazaqstan Respýblıkasynyń Táýelsizdiginiń 25 jyldyǵyna arnalǵan «Uly Dala eliniń ulyq merekesi!» atty saltanatty jıyn uıymdastyryldy.
Merekelik sharada Abaı mýzeıiniń dırektory B.Júnisbekov «Táýelsizdik shejiresi – erlik pen eldiktiń shejiresi» taqyrybynda baıandama jasap, óz sózinde: «Táýelsizdik – eń basty qundylyǵymyz. Bul kún Qazaqstan tarıhynda máńgi óshpes altyn áriptermen jazyldy. Artyna óshpes iz qaldyrǵan, halqymyzdyń bolashaǵyn arman etken ata-babalarymyzdyń Uly Abaıdyń maqsat-muratyna biz búgin qol jetkizdik. Búgingi kúnde Elbasy Nursultan Nazarbaevtyń syndarly saıasaty men elimizdiń strategııalyq damý josparynyń nátıjesinde órkenıet kóshine Qazaqstan degen memleket qosyldy. Táýelsiz elimizde ultaralyq dostyq pen beıbitshilik nyǵaıyp, órkenıetti memleketterdiń qatarynan oryn aldy», - dep aıryqsha atap ótti.
Táýelsizdigimizdiń 25 jyldyǵyna oraı Abaıdyń memlekettik qoryq-mýzeıiniń dırektory B.Júnisbekov «Qurmet» ordenimen marapattaldy.
Sonymen qatar, shara barysynda qalanyń zııaly qaýym ókilderi, ardagerler men mýzeı qyzmetkerlerine «Qazaqstan Respýblıkasynyń Táýelsizdigine 25 jyl» merekelik medali tapsyryldy.