QR Táýelsizdiginiń 25 jyldyǵynda aqtóbelikter 5 myń páterge, 6 myńnan astam jer ýchaskesine ıe boldy, dep habarlady oblys ákimdigi.
«Aqtóbe oblysynyń basshylyǵy Memleket basshysy Nursultan Nazarbaevtyń halyqtyń ál-aýqatyn jaqsartý jónindegi tapsyrmalaryn oryndaý boıynsha sharalar qabyldap jatyr. Turǵyn úılerdiń, áleýmettik nysandardyń qurylysy - óńirde osy maqsatta jasalyp jatqannyń bir bóligi ǵana. Jalpy alǵanda, bıylǵy jyly oblysta «Qoljetimdi turǵyn úı», «О́ńirlerdi damytý» memlekettik baǵdarlamalary aıasynda jáne «QTQJB» salym salýshylary arasyndaǵy turǵyn úı qurylys jınaqtary jelisi boıynsha 5000 páterdiń kilti tabystaldy», - delingen habarlamada.
Budan bólek, sońǵy 5 jyl ishinde qarjylandyrýdyń barlyq kózderi esebinen 2,3 mln astam sharshy metr turǵyn úı paıdalanýǵa berilgen, bul oblystyń 19 myń otbasyn turǵyn úımen qamtamasyz etýge múmkindik berdi. Oblystyń turǵyn úı qurylysynda qarjylandyrýdyń barlyq kózderi esebinen 163 mlrd teńgeden astam ınvestısııa tartylǵan. Aǵymdaǵy jyly keminde 580 sharshy metr turǵyn úıdi paıdalanýǵa berý josparlanyp otyr.
«О́ńirlerdi damytý» baǵdarlamasy aıasynda «Nur Aqtóbe» shaǵyn aýdanynda 2016 jyly turǵyn úılerdiń taǵy 23 blok-seksııasynyń qurylysy bastaldy, bul jalpy aýdany 75,9 myń sharshy metrdi quraıtyn qosymsha 1278 páter. Úılerdiń qurylysy 2017 jyly aıaqtalmaq. Budan bólek oblys turǵyndaryna alty myńnan astam jer ýchaskesi berilgen.