Bıdi bılese Úndi eliniń ul-qyzdary bılesin... Kez kelgen kınosynda kúlip tursa da, jylap tursa da myń buralyp jurtty úıirip ala jóneledi. Áıteýir, osynaý ystyq eldiń bıge degen yqylasy, qurmeti tym erekshe. Kezinde «Bıle, bıle» degen kıno shyǵaryp, jastardy jappaı bıletip jibergen de osy el ǵoı.
Endeshe, bıden báıge bermeıtin Úndistanǵa baryp bizdiń ul-qyzdar ónerimen tańǵaldyra alýy múmkin be? Múmkin eken. Naǵyz talanttar qaıda júrse de top jarady ǵoı. Jambyl oblysyndaǵy «Aq kerbez» ansambliniń 8 bıshisi jaqynda Úndistannyń Nıý-Delı, Chennaı, Kalkýtta, Gývahatı, Shıllong jáne Port-Bler qalalarynda óner kórsetip qaıtty.
– Ol jaqtaǵy jurt bı ónerine shynynda óte qatty mán beredi eken, – deıdi ansambldiń horeografy Aıjan Qonarbaeva. – Áıteýir, qaıda barsań da zal, alań toly kórermen. Alty bı bıledik. Ár bıdiń arasynda Qazaqstan týraly, qazaqtardyń salt-dástúri týraly rolıkter kórsetilip turdy. Port-Bler qalasyna barǵanymyzda uıymdastyrýshylar led-ekran tappaı, konsert eki saǵatqa keshigip bastaldy. Biraq birde-bir kórermen qolyn siltep ketip qalǵan joq. Qorytyndy konsertimiz Nıý-Delı qalasynda ótti. Bizben birge basqa da shet memleketterden jáne Úndistannyń ózinen kelgen birqatar bı ujymdary ónerlerin kórsetti. Qazaqtyń bı ónerin moıyndaǵany bolar qorytyndy konsertti qazaq bıshileri ashty. Olarǵa, ásirese, «Qarajorǵa» bıi men ulttyq kıimderimiz qatty unady.
Árıne, «Aq kerbez» shaǵyn ǵana óner ujymy ǵoı. Biraq jat jerde qazaqtyń jaqsy atyn áıgilep, ónerin moıyndatyp, alǵysyn alǵan osynaý ul-qyzdardan aınalyp ketpeısiń be!
Oralhan DÁÝIT,
«Egemen Qazaqstan»