Qar qursaýyndaǵy qala

Bıyl qar qalyń túsedi dep kim oılaǵan? О́tken jyldary jaýǵan qardyń mólsherine eseptelgen tehnıkanyń daıyndyǵy kóńilden shyqpady. Qańtar aıy­nan soń aqpan da ashýly minez tanytyp tur. Shyǵystyń bet qaratpas úskirik aıazy men qalyń qary qalany da, dalany da áýre-sarsańǵa saldy. Mamandar bıylǵy qar buǵan deıingi jyldarmen salystyrǵanda áldeneshe ese artyq túsken deıdi. Qazir qalyń qardyń kesirinen kólik keptelisteriniń aldyn alý sharalary birinshi kezekke qoıyldy. Desek te,  qalalyq avtomobıl joldary jáne kólik qatynasy bóliminiń bastyǵy Iýrıı Pazyna omby qardyń álegi ońaı emestigin jetkizdi. Búginge deıin úsh merdiger mekemeniń kúshimen qala aýmaǵynan 70 myń tekshe metr qar shyǵarylǵan. Qala ishindegi joldardy tazalaýǵa ketken qarjy aıyna 60 mln teńgeni quraıdy. Alaıda, jolda kisi boıyndaı qar áli úıilip jatyr. Jeke turǵyn úı sektory da birshama problema týǵyzyp otyr. Olar aýladaǵy qardy kóshege úıip qoıǵanǵa úırenip alǵan. Bul óz kezeginde jol boıyndaǵy kólik qatynasyna kedergi keltirýde. Osynyń bári kóktemde erise ne bolmaq?.. – Jeke sektorda úıi bar turǵyndarǵa eskertkimiz keledi, – deıdi Iýrıı Pazyna, – ózara birlesip, qardy qalanyń syrtyna shyǵarýǵa tyrysyńyzdar. Kóshege úıip tastamańyzdar. «Semeıdi kógaldandyrý jáne abattandyrý» kásiporny 1 tekshe metrine 2,5 myń teńgeden sizderge qajetti tehnıka qyzmetin usyna alady. Al múgedekter men jaǵdaıy tómen otbasylarǵa, zeınetkerlerge tegin kómektesemiz. Qar tazalaý jumystary durys jolǵa qoıylmasa, aqpan aıynyń sońynda jergilikti polısııa aıyppul salýdy bastamaq. Bul – kásipkerlik nysandarǵa ıelik etetin shaǵyn jáne orta bıznes ókilderine de qatysty sheshim. Degenmen, qala turǵyndarynyń qar tazalaý jumystaryna kóńil­deri tolmaı otyr. Qalyń túsken qar, muztaıǵaq... Ár tún saıyn jol tazalaýǵa 30 tehnıka, 100-ge jýyq jumys kúshi jumyl­dy­rylsa da, jaǵdaı máz emes. – Bizdiń qala úshin 30 tehnıka óte az, – dedi Iýrıı Pazyna, – sońǵy bes jyl ishinde qalaǵa qar tazalaıtyn tehnıka múlde alynbaǵan. Qoldanystaǵy tehnı­kalardyń tozyǵy jetti. Biz qala ákimine jańa tehnıka satyp alý úshin qyzmettik hat jazdyq. Qardy tolyq tazalaýǵa qajetti tehnıkany satyp alýǵa 500 mln teńge kóleminde qarjy bólýdi surap otyrmyz. Al áý basta durys tazar­tyl­maǵan qar qatyp, endi kók­taıǵaq muzǵa aınaldy. Jaıaý júrginshi de, avtokólik ıeleri de mezi bolyp otyr. Raýshan NUǴMANBEKOVA, jýrnalıst