Ekaterına AIDOVA,
Qysqy Ýnıversıadanyń eki dúrkin qola júldegeri:
Dárigerlerdiń aıtqanyn tyńdamadym
HHVIII Qysqy Ýnıversıadada óner kórsetip jatqan Ekaterına Aıdova Qazaqstan qorjynyna búgingi kúnge deıin eki qola medal alyp berdi. Bizge bergen suhbatynda jeńiske jetý úshin alǵan jaraqaty kedergi bolǵanyn aıtqan Katıa aldaǵy josparymen de bólisti.
– Ekaterına, siz úshin Qysqy Ýnıversıada men Olımpıadanyń aıyrmashylyǵy qandaı?
– Eki dodany bir-birimen salystyrýǵa kelmeıdi ǵoı. Soǵan qaramastan, jarysty óte joǵary deńgeıde uıymdastyra alǵan elime qýanyp otyrmyn. Munymen Qazaqstan qysqy Olımpıadany tolyqqandy ótkize alatynyn dáleldep otyr. Men eki Olımpıadaǵa qatyssam da, Ýnıversıadada birinshi ret baq synap otyrmyn. Bul jarysta eki dúrkin qola júldeger atanǵanyma qýanyshtymyn. Qos medalim tórimde ilinip turatyny sózsiz.
– Aıtqym kelgeni, stýdentter saıysynda úshinshi oryn alyp otyrsyz. Al tájirıbeli ákki sportshylarmen álem chempıonaty men Olımpıadada baq synaǵanda nátıjeńiz quldılaıtyny sózsiz ǵoı...
– Bir nárseni umytpaý kerek, bul stýdentter saıysy. Soǵan qaramastan, jarysta júgirip ótken ýaqytymmen álemdik saıystarda úzdik ondyqqa kirýge bolady. Aýa-raıynyń qolaısyzdyǵynyń kesirinen alǵashqy aınalymda durys júgirip óte almadym. Ekinshi aınalymda nátıjemdi jaqsartyp, jeńimpazdar qatarynan kórine aldym. Sondyqtan, jospardy oıdaǵydaı oryndaı aldym dep aıta alamyn. Bir biletinim, men bul kórsetkishpen toqtap qalmaımyn.
– Bárekeldi! Sizdi jaraqat aldy dep estidik, tolyq aıyǵa aldyńyz ba?
– Sportty kásip etkenderdiń deni jaraqat alyp jatady. Men de solardyń qataryn tolyqtyrdym. Arqama ota jasaǵannan keıin, dárigerler maǵan 6 aıǵa deıin jattyǵý jasaýyma tyıym saldy. Osylaısha jaz aıynda jasalatyn daıyndyqty ótkizip aldym. Biraq, aq halattylardy tyńdamaı 3 aıdan keıin konkıimdi kıe bastadym. Qazir densaýlyǵyma shaǵym aıta almaımyn.
– Aldaǵy josparyńyzben bólisseńiz?
– 7 aqpan kúni Ońtústik Koreıada ótetin álem chempıonatyna qatysamyz. Onda men jeke baǵdarlama boıynsha synǵa túsemin. Artynsha Japonııada ótetin Qysqy Azııa oıyndarynda baq synaımyn. 26-27 aqpanda Kanadanyń Kalgarı qalasynda jalaýy jelbireıtin sprınttik saıysta óner kórsetemiz.
– Qysqa ǵana ýaqytta sonshama jarysqa qatysyp, júgirý qıynǵa soqpaı ma?
– Bul sport qoı. Barlyǵy aldyn-ala josparlanǵan saıystar. Men úshin jaraqatymnan keıin kórsetkishimdi jaqsartýdyń birden-bir joly osy ǵoı deımin. Sizdi taǵy bir tańǵaldyraıyn, Kalgarıden keıin Astanada ótetin Qazaqstan chempıonatynda baq synaımyn. Osymen bizdiń maýsym aıaqtalady.
– Áńgimeńizge rahmet, bıik tuǵyrdan kórine berińiz!
Áńgimelesken
Almas MANAP,
«Egemen Qazaqstan»