«Astana Opera» teatry tamasha solısteriniń oryndaýynda naǵyz klassıkaǵa aınalǵan týyndylar men halyq ánderi, sondaı-aq zamanaýı kompozıtorlardyń shyǵarmalary shyrqalady. «Injý-marjan» konserti 5 aqpanda Kameralyq zalda ótedi, dep habarlaıdy teatrdyń baspasóz qyzmeti.
Konsert uıymdastyrýshylary kórermendi jańa ári sırek oryndalatyn mýzykalyq týyndylarmen qýantatyn bolady. Kameralyq zal sahnasynda alǵash ret T.Beısenbektiń «Aqqýym» áni, E.Rahmadıevtiń «Alpamys» operasynan Mystannyń tarantellasy, sondaı-aq Ǵ.Jubanovanyń «Eńlik - Kebek» operasynan arıozo, B.Qadyrbektiń «Úsh qońyrdyń aıaǵy qum bolady» áni shyrqalady.
Kesh baǵdarlamasynda operalardan arııalar men dýetter, Abaı, Jaıaý Musa týyndylary, halyq ánderi, sondaı-aq E.Brýsılovskıı, M.Tólebaev, S.Muhamedjanov, E.Rahmadıev, B.Baıqadamov, Ǵ.Jubanova, M.Mańǵytaev, N.Meńdiǵalıev, T.Beısenbek, S.Erkimbekov, B.Qydyrbek shyǵarmalary usynylady.
- Konserttiń basty maqsaty - qazaqtyń ulttyq mýzykasyn kópshilikke nasıhattaý bolyp tabylady. Bul shyǵarmalar - naǵyz baǵa jetpes qazyna, sondyqtan ártisterdiń qazirgi urpaǵy olardy baǵalap, saqtap, jıi oryndap júrýleri tıis. Osyndaı ózindik ereksheligi basym, biregeı mýzykalyq muramyz baryna qýanyp, elimizdiń mýzykalyq mádenıetin maqtan tutamyz. Bizben birge «Injý-marjan» jobasyna qatysyp jatqan teatr rejısseri Natalıa Kagadıı konserttiń qyzyqty tujyrymdamasyn jasaýda. О́tken jyldar tájirıbesine súıene otyryp, biz kórermenge dýetterdiń óte unaıtynyn baıqadyq. Sol sebepti baǵdarlamaǵa juptar ansamblderin qostyq. Sahnada ánshiler súıý men qaıǵyrý, qoshtasý men qaıta kezdesý sezimderin bastan keshedi, - deıdi Roza Nurkeı.
О́z ónerin pash etetin tamasha ártister - Saltanat Muratbekova, Roza Núrkeı, Ramzat Balakıshıev, shaqyrylǵan qonaǵymyz - barıton Azamat Jyltyrkózov.
Fortepıano partııasy - Janar Ahmetova, rejısser - Natalıa Kagadıı