Almatydaǵy Ýnıversıadanyń shaıbaly hokkeı dodasynda qazaqstandyq sheberler Chehııa qurama komandasymen muz ústinde ımek taıaq túıistirip, qarsylastaryna qaraǵanda, ózderiniń shyn myqty ekendikterin dáleldedi. Bizdiń hokkeıshilerdiń tegeýrinine shydaı almaǵan qonaqtar 0:8 esebimen oısyraı utylýǵa májbúr boldy.
«Halyq Arena» muz saraıynda ótken bul matchta Konstantın Savenkov pen Artem Býrdelev eki retten shaıba saldy. Sondaı-aq, Dmıtrıı Grens, Nıkıta Mıhaılıs, Anton Petrov jáne Kırıll Savıskıı syndy oıynshylar da muz ústinen gol soqpaı ketpedi.
Buǵan deıin Qazaqstan quramasy Qytaı (22:0) men Shvesııany (5:0) da kúırete jeńgen bolatyn. Sóıtip, Sergeı Starygınniń úsh kezdesýde óz qaqpasyna bir de bir shaıba jibermegen shákirtteri toǵyz upaımen týrnırdiń pleı-off kezeńine ótti. Shırek fınalda bizdiń hokkeıshiler irikteý kezeńinde 3-oryn alǵan Shvesııa quramasyn 4:0 esebimen jeńip, jartylaı fınalǵa joldama aldy. Qazaqstandyqtar jartylaı fınalda Slovakııany 4:3 esebimen býllıt boıynsha jeńgen Chehııa quramasymen kezdesedi. Ekinshi jartylaı fınaldyq oıyn Kanada men Reseı quramalarynyń arasynda ótedi.
* * *
О́kinishke qaraı, qyzdar arasyndaǵy synda Qazaqstan quramasy besinshi-jetinshi oryndar úshin bolǵan matchta Japonııa hokkeıshilerinen 0:4 esebimen utylyp qaldy. Budan buryn bizdiń hokkeıshi qyzdarymyz Ulybrıtanııa komandasyn 11:0 esebimen utyp, Kanada (0:11) jáne Qytaı (1:4) hokkeıshilerine ese jibergen bolatyn.
Sonymen, Qazaqstannyń qyzdar quramasy Ýnıversıadanyń hokkeı synyndaǵy sońǵy kezdesýin búgin Ulybrıtanııa komandasymen ótkizedi.
Qaırat ÁBILDINOV, «Egemen Qazaqstan»