Elimizdiń qos palataly Parlament depýtattaryna asa mańyzdy mindet júktelip otyr. Olar aqpannyń alǵashqy onkúndiginde oblystardyń aýdandary, qalalary men shalǵaı aýyldarynda bolyp, Elbasynyń halqymyzǵa arnaǵan Joldaýynyń basty basymdyqtaryn jáne bılik tarmaqtary ókilettikterin bólý sharttaryn jurtshylyq júregine jetkizýge tıis.
Aqmola oblysyna kelgen Májilis depýtattary eki topqa bólinip, jumysty belsendi túrde júrgizdi. Elge tanymal azamattar aldymen Astrahan jáne Selınograd aýdanynyń halyq tyǵyz qonystanǵan tórt eldi mekeninde boldy. Depýtattar Murat Temirjanov, Sergeı Zvolskıı, Maıra Aısına, Petr Sharapov, Irına Aronova, Irına Ýnjakova Novocherkasskoe, Astrahan, Rodına, Aqmol aýyldarynda kópshilik kóńilindegi keleli áńgime órbitti.
Halyq qalaýlylary Elbasynyń «Qazaqstannyń Úshinshi jańǵyrýy: jahandyq básekege qabilettilik» Joldaýynyń strategııalyq bes basymdyǵynyń mazmunyn, soǵan baılanysty alǵa qoıylǵan mindetter men múmkindikterdi saralaı taldady. Sonymen qatar, memlekettik bılik ókilettikterin bólýdiń demokratııalyq qadamdardy qýattandyrýdaǵy maqsattary ashyp kórsetildi.
Jurtshylyqpen kezdesýlerdegi pikir almasýlar barysynda el ishin tolǵandyryp otyrǵan suraqtar qoıylyp, naqty usynystar aıtyldy. Máselen, aýyl turǵyndary memlekettik baǵdarlamalardyń yqpalyn arttyrý qajettigine nazar aýdardy. Ásirese, «Nurly jer» baǵdarlamasynyń aıasynda aýyl turǵyndary úshin jeke turǵyn úı qurylysyna nesıe qarajatyn bólýdi ońtaılandyrý ózekti bolyp otyr. Bul turǵyda «Turǵyn úı-qurylys jınaq bankiniń» aldyn ala qarjy jınaqtaý talaptaryn qaıta qaraý jóninde ótinishter túsip jatty. Joǵarydaǵy tórt aýyldaǵy kezdesýlerge qatysýshylardyń deni shaǵyn jáne orta bıznesti damytý úshin ekinshi deńgeıdegi bankter nesıesiniń qoljetimdiligin qamtamasyz etý, aýyldyq kooperatıvterdiń bolashaǵy, jekemenshik quqyǵynyń qorǵalýy, baǵa men tarıf saıasaty, qarjylyq saýattylyqty arttyrý, úshtuǵyrly til sııaqty máselelerdi kóterdi. Buǵan Májilis depýtattary tııanaqty túsinik berdi.
Murat TEMIRJANOV: Qazaqstan Prezıdenti Nursultan Nazarbaevtyń jańa Joldaýynda sizderdi mazalaıtyn suraqtarǵa jan-jaqty jaýap qaıtarylǵan. Elimizdi túbegeıli jańǵyrtýdyń úshinshi kezeńi osy máselelerdiń keshendi sheshilýine de baılanysty bolmaq. Saılaýshylarymyzdyń 40 paıyzy aýyldyq jerlerde turatyndyqtan, ózim de osy salanyń ókili bolǵandyqtan, Elbasy Joldaýyndaǵy «Agrarlyq sektor ekonomıkanyń jańa draıverine aınalýy kerek» degen basymdyqty mereıli mindet sanaımyn. Bul qoǵamnyń ortaq kúsh-qarymymen júzege aspaq. Onyń tıimdi joldary ashyp kórsetildi. «Made in Kazakhstan» brendi álemniń kóptegen memleketterine belgili. Áıtkenmen, dıqandarymyz táýekelshildikpen jumys isteıdi. Sýbsıdııalaý jalǵasyn tabatyn bolady. Biraq, aýa raıyna táýeldilik saqtandyrý máselesin jetildirýdi talap etýde. Endigi jerde óndirilgen ónimdi saqtandyrý tártibi kepildi ótemdi qamtamasyz etýmen qatar, sheteldik saqtandyrý kompanııalarynyń qyzyǵýshylyǵyn arttyrady degen oıdamyn.
Úı sharýashylyǵy men fermerlik qurylymdardy kooperatıvterge biriktirýdiń aqmolalyq tájirıbesi nazar salarlyqtaı. Qarjylandyrý máselesi de artyp keledi. Memleket burynǵy 3 mıllıon teńgelik shaǵyn nesıeni 16 mıllıonǵa jetkizý arqyly kásipkerlikti barynsha damytýǵa jol ashyp berip otyr. Bul qala men aýyl turǵyndarynyń birdeı múmkindikke ıe ekendigin kórsetedi.
Maıra AISINA: «Jańǵyrý 3.0» Joldaýynyń barlyq basymdyqtary Qazaqstan halqynyń, memleketiniń abyroıly damýyn kózdeıdi. Munda ındýstrııaǵa sıfrlyq tehnologııany engizý asa mańyzdy. Memleket basshysy alǵashqy basymdyqtar qatarynda Úkimetke IT-startaptar halyqaralyq tehnoparkin qurýdy tapsyrýy jańa dáýir talaptarymen úndes keledi. Bul ekonomıkany barynsha damytýmen birge qoldanystaǵy qurylymdardy jetildirýge múmkindik beredi. Otbasylyq bıznes, qarjylyq saýattylyq, taǵy basqa qajettilikter osydan bastalady. О́mir sapasyn arttyrý óz qolymyzda degenimiz de osy.
Balalarymyz bazalyq bilim alyp qana qoımaı, ony tıimdi paıdalanatyn tulǵa dárejesine kóterilýi kerek. Biz jedel bankıng, elektrondy qyzmetti paıdalanýymyz qajet. Jańa dáýir adamdary endigi jerde syrttaı baıqaýshy bola almaıdy. Osy jerde keń uǵymdaǵy tárbıe isiniń aýqymy artatyndyǵyna, oǵan barshamyzdyń qatysýymyz kerektigine nazar aýdarǵym keledi.
Baqbergen AMALBEK, «Egemen Qazaqstan»
Aqmola oblysy