Qoınaýy «qara altynǵa» toly Atyraý oblysynda taǵy bir arnaıy ekonomıkalyq aımaq jumysyn bastaıdy. Byltyrǵy 1 jeltoqsandaǵy Úkimettiń qaýlysymen qurylǵan jańa aımaqtyń qandaı ereksheligi bar?
Qujatta arnaıy ekonomıkalyq aımaqtyń 2036 jylǵy 31 jeltoqsanǵa deıin jumys isteıtini kórsetilgen. Jańa qurylym Atyraý-Dossor tas jolynyń janyndaǵy jalpy aýmaǵy 450 gektar jer telimine ornalasady.
Bul aımaqty qurýdyń birneshe maqsaty bar. Birinshiden, joǵary tehnologııalyq, básekege qabiletti óndiristerdiń jedel damýyna jaǵdaı jasalady. Ekinshiden, jańa ınvestısııa tartylyp, onyń kólemi 320 mlrd teńgeni quraıdy. Onyń ishinde sheteldik ınvestısııa – 120 mlrd teńge, al otandyq ınvestorlar quıatyn qarjy 200 mlrd teńgeni quraıdy. Úshinshiden, zamanaýı tehnologııalardy engizý, qyzmet kórsetý sapasyn arttyrý kózdelip otyr. Tórtinshiden, jergilikti turǵyndardy jumyspen qamtý kórsetkishi artady. Besinshiden, birneshe ónimin óndirý men qyzmet kórsetý kórsetkishi 410 mlrd teńgeni quraǵaly otyr. Osy oraıda jańa ekonomıkalyq aımaqta óńdeýshi ónerkásiptiń hımııa, munaı-hımııa, metallýrgııa, beımetall mıneraldyq ónimderi, metall óńdeý, rezeńke jáne plastmassa buıymdary sekildi baǵyttardy damytýǵa basymdyq beriledi.
Altynshydan, arnaıy ekonomıkalyq aımaq aýmaǵynda arnaıy quqyqtyq rejim engiziledi. Munda erkin keden aımaǵynyń kedendik rásimin qoldaný kózdelip otyr. Qujatqa sáıkes, erkin keden aımaǵy áreket etetin ýchaske kedendik baqylaý aımaǵy sanalady. Sol sebepten kedendik baqylaýdy qamtamasyz etý úshin qajetti jabdyqtarmen qamtylady. Osyǵan baılanysty keden salasyndaǵy ýákiletti organ aımaqtyń perımetrin qorshaý, beınebaqylaý júıesimen jabdyqtaý sekildi talaptardy belgileıdi.
«Atyraý» arnaıy ekonomıkalyq aımaǵyna 2036 jylǵa deıin 70 kompanııanyń qatysatyny naqtylanypty. Osy kezeńge deıin munda 2500 jumys ornyn ashý kózdelip otyr. Ashylatyn óndiriste otandyq eńbekkerler 85 paıyzdy qurýǵa tıis.
Oblys ákimi Serik Shápkenovtiń aıtýynsha, bul – kómirsýtegi shıkizatynyń 65 paıyzy shoǵyrlanǵan óńirdiń óndiristik áleýetin arttyratyn joba. О́ıtkeni atalǵan aımaqta tek munaı-gaz hımııasyna ǵana emes, barlyq salaǵa serpin beretin ónim shyǵarylady.
«Bizdiń maqsatymyz – tek shıkizatty óndirý emes, ony óńdeý, ónerkásipti damytý ári sapaly jumys oryndaryn qurý. Bul óńirdiń turaqty damýy men ınvestısııalyq tartymdylyǵyn qamtamasyz etedi», deıdi S.Shápkenov.
Atyraý oblysy