Astanada «IDEL» tatar jáne tatar-bashqurt mádenı ortalyǵy qaýymdastyǵy» qoǵamdyq birlestiginiń jıyny ótti. Oǵan Qazaqstan halqy Assambleıasynyń músheleri, respýblıkalyq etnomádenı birlestikterdiń belsendileri, QHA Ǵylymı-saraptamalyq keńesi men zııaly qaýym ókilderi, jastar qatysty.
Jıyn barysynda Memleket basshysy Nursultan Nazarbaevtyń konstıtýsııalyq reformasyna baılanysty usynystardy ázirleý máseleleri, sondaı-aq, «Qazaqstannyń Úshinshi jańǵyrýy: jahandyq básekege qabilettilik» atty Joldaýy talqylandy. Máselen, otyrysqa qatysýshylar Joldaýda aıtylǵan 5 basymdyq qoǵamdaǵy túıtkildi de ózekti, kúrdeli máselelerdiń sheshimin tabýǵa negiz bola alatynyna toqtala kele, olarda kóterilgen árbir másele kezeń-kezeńimen júzege asyrylsa, memlekettiń odan ári damýyna, básekege qabiletti bolýyna aıtarlyqtaı yqpal etetinin jetkizdi.
Sondaı-aq, basqosýǵa qatysýshylar bılik tarmaqtary arasynda ókilettikterdi qaıta bólý memleket qurylymyn jańa zamanǵa saı júıeleýge alǵyshart bolatynyn atap ótti. Máselen, Qazaqstan halqy Assambleıasy músheleriniń oı-paıymynsha, mundaı ózgerister Úkimet pen Parlamenttiń rólin kúsheıtip qana qoımaı, olarǵa úlken jaýapkershilik júktemek. Osy oraıda, bılik tarmaqtary arasynda ókilettikterdi qaıta bólý arqyly olardyń arasyndaǵy teńgerimdilikti durys saqtaı bilgen jón. Demek, eger bıliktiń ár tarmaǵy óziniń jumysyn nátıjeli túrde atqaratyn bolsa, memlekettik bılik oıdaǵydaı qyzmet etpek. Mundaı jaýapkershilikti aldaǵy ýaqytta Parlament depýtattary aıqyn sezinetin bolady.
Láıla EDILQYZY, «Egemen Qazaqstan»