Qaraǵandyda oblystyq prokýratýranyń janyndaǵy Zańdylyqty qamtamasyz etý jónindegi konsýltatıvtik keńestiń otyrysy ótti. Onyń jumysyna barlyq memlekettik organdardyń, úkimettik emes uıymdardyń, bıznes qaýymdastyqtary jáne din ókilderi qatysty.
Oblys ákimdiginde ótken jıyndy Qaraǵandy ekonomıkalyq ýnıversıtetiniń rektory Erqara Aımaǵambetov júrgizdi. Elbasynyń «Qazaqstannyń Úshinshi jańǵyrýy: jahandyq básekege qabilettilik» Joldaýynda berilgen, qoǵamda radıkaldyq kórinesterge múldem tózbeýshilik kózqarasyn qalyptastyrý týraly tapsyrmasyna sáıkes, oblys prokýratýrasy áleýmettik-ekonomıkalyq problemalardy sheshýge baǵyttalǵan «Turǵyndardyń senimi» jobasyn júzege asyrýda.
– Quqyq qorǵaý org andarynyń halyqpen ózara qarym-qatynasyn nyǵaıtý − bizdiń basty maqsatymyz. Azamattarǵa tártip tek polısııaǵa ǵana emes, árqaısymyzǵa baılanysty ekenin jetkizý. Quqyq buzýshylyq týraly kez kelgen habarlama mańyzdy. Osyǵan deıin atalǵan máseleler boıynsha 150-den astam shara ótkizildi. Úıler boıynsha basshylardy belgilep, aýdandardy sektorlarǵa bólip, ár sektorǵa ýchaskelik ınspektor bekittik. Jalǵa beriletin páterler, dástúrden tys dinı aǵymdardyń músheleri, kúdikti adamdar jınalatyn oryndar, jaǵdaısyz otbasylary týraly 600-den astam habarlama tústi, – deıdi oblys prokýrorynyń orynbasary M.Taýtenov.
Jıynda sóz bolǵandaı, óńirdiń áleýmettik-ekonomıkalyq jáne dinı jaǵdaılaryn saýyqtyrý máseleleri boıynsha 350-den astam shara ótkizilip, 100-den astam turǵynǵa kómek kórsetilgen. Sonymen qatar, derbes profılaktıkalyq sharalar ótkizý barysynda, qoıylǵan maqsattarǵa jetý úshin quramyna bilikti mamandar kirgen toptar qurylǵan. Olardyń kópshiligi memlekettik qyzmetshiler emes, dárigerler, teologtar, psıhologtar, bıznes-qoǵamdastyqtyń jáne din ókilderi.
Keńeske qatysýshylar oblys prokýratýrasynyń bastamalaryna qoldaý kórsetti. Áleýmettik problemalardy sheshý qoǵamdyq turaqtylyqqa jaǵymdy yqpal etetini ataldy. Talqylaý barysynda ótkizilip jatqan jumystardyń tıimdiligin arttyrýǵa baǵyttalǵan keńester men usynystar aıtyldy.
Mıras ASAN,
«Egemen Qazaqstan»
QARAǴANDY