Oblys ákimi Málik Myrzalın Reseıde jáne shet elderde aýyl sharýashylyǵy óniminiń kóterme saýdasymen aınalysatyn «SKAI» JShC kompanııasynyń basshysy Mıhaıl Vasenkevıchpen kezdesti.
Kezdesýde oblys basshysy Aqmola oblysynyń Qazaqstanda ósiriletin bıdaıdyń edáýir bóligin óndiretin agroónerkásiptik óńir ekenin atap ótti. Jyl saıyn oblys 32 elge 2 mln tonnaǵa jýyq astyq eksporttaıdy.
«Aqmola oblysy ınvestısııalardy tartý úshin úlken áleýetke ıe jáne yntymaqtastyqty keńeıtý úshin usynystardy qaraýǵa daıyn. Bizdiń oblysymyz Astana mańyndaǵy óńir bolyp tabylady jáne Astana naryǵy úshin aýyl sharýashylyǵy ónimin basty jetkizýshilerdiń birine aınalýy tıis», – dedi ákim.
«SKAI» JShS kompanııasynyń basshysy Mıhaıl Vasenkevıch Iranmen jáne Jerorta teńizi elderimen astyq daqyldaryn eksporttaý boıynsha yntymaqtastyq jasaıtynyn aıtty. Ol astyq daqyldaryn ósirýge, aýyl sharýashylyǵy taýar óndirýshilerinen 500 myńnan 1 mln tonnaǵa deıin astyq satyp alýǵa jáne Aqmola oblysynda astyqty tereń óńdeý termınaldarynyń qurylysyn ınvestısııalaýǵa daıyn ekenin jetkizdi.
«Biz úshin eń bastysy – astyq sapasyn arttyrý. Sebebi qazirgi ýaqytta tutynýshylar ekologııalyq taza ónimdi talap etedi, al sizdiń óńirińizde astyq sapasy óte jaqsy», - dedi M. Vasenkevıch.
Kezdesý sońynda taraptar et jáne sút ónimderin óńdeý salasyndaǵy jobalardy iske asyrýdaǵy yntymaqtastyq máselelerin talqylady.