Bıyl elimizde qys erte túsip, aýa raıynyń kúrt nasharlaýy halyqty ábigerge salýda. Qalyń túsken qar, anomaldy tómen temperatýra, burqasyndar men borandar kóptegen tótenshe jaǵdaılardyń oryn alýyna sebep bolyp otyr. Bul týraly Ortalyq kommýnıkasııalar qyzmetinde ótken brıfıng barysynda Ishki ister mınıstriniń orynbasary Iýrıı Ilın aıtyp berdi.
«Tek qazan-qarasha aılarynda «Qazgıdromet» RMK elimizdiń óńirlerinde aýa raıynyń kúrt nasharlaýy týraly 45 daýyldy aldyn ala eskertý taratty. Aýa raıynyń nasharlaýyna (kóktaıǵaq, burqasyn, temperatýranyń tómendeýi) baılanysty dızel otynymen júretin qoǵamdyq jáne júk avtokólikteri úshin Astana qalasy, Aqmola, Almaty, Shyǵys Qazaqstan, Qaraǵandy, Qyzylorda, Pavlodar, Jambyl jáne Soltústik Qazaqstan oblystarynda jol qozǵalysy 38 ret jabyldy», – dedi Iý. Ilın.
Ol sondaı-aq qar basatyn ýchaskelerdiń jalpy qashyqtyǵy 3399,82 shaqyrymdy quraıtynyn, 42008,6 shaqyrym jol ýchaskesine qardan qorǵaıtyn qalqandar ornatylǵanyn atap ótti.
«Jalpy jeke quramnan 120 myńnan astam adam men 22 myńnan astam birlik tehnıka bar 9849 azamattyq qorǵaý quralymy ázirlikke keltirildi. Onyń ishinde IIM bólimsheleriniń (Ulttyq ulan, Tótenshe jaǵdaılar komıteti, Ákimshilik polısııa komıteti) komandalyq-shtabtyq mashınalaryn, vahtovkalardy, kez-kelgen jerde júre alatyn mashınalardy, avarııalyq-qutqarý jáne mamandandyrylǵan áskerı tehnıkany qosa alǵandaǵy 1926 birlik ótimdiligi joǵary tehnıkasy bar», – dep málim etti mınıstrdiń orynbasary.
Aıdar О́risbaev,
"Egemen Qazaqstan".