Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Prezıdent janyndaǵy Azamattyq máseleleri jónindegi komıssııanyń kezekti otyrysy ótti. Bul týraly Aqordanyń baspasóz qyzmeti habarlady.
Otyrysta Qazaqstannyń azamattyǵyna qabyldaý jáne odan shyǵý máseleleri qarastyryldy.
Memlekettik hatshy Gúlshara Ábdiqalyqova Qazaqstannyń azamaty bolýǵa talpynǵan adam sany táýelsizdik alǵan sátten bastap turaqty túrde ósip kele jatqanyn atap ótti. Bul jaıt Elbasynyń parasatty basshylyǵy arqasynda elimiz qol jetkizgen áleýmettik-ekonomıkalyq turaqtylyqtyń, ultaralyq jáne azamattyq tatýlyq pen ornyqty damýdyń aıqyn aıǵaǵy bolyp sanalady.
«Biz respýblıka táýelsizdiginiń 25 jyldyǵynyń qarsańynda elimizdiń jańa azamattaryn ystyq yqylaspen qýana qarsy alamyz. Olarǵa baqytty ómir jáne endi olardyń da Otany bolyp sanalatyn elimizdiń ıgiligi jolyndaǵy jumystaryna tabys tileımiz. Qazaqstannyń laıyqty azamaty atanyp, egemendi elimizdiń odan ári damýyna olar óz úlesterin qosady dep senemin», – dedi Memlekettik hatshy.
Memleket basshysy tıisti Jarlyqqa qol qoıǵannan keıin taıaý jáne alys shetelderden kelgen ártúrli ulttyń 622 ókili jańa qazaqstandyqtar atanady.
Sondaı-aq, jıynda Ishki ister mınıstrliginiń Qazaqstan Respýblıkasy azamattyǵyna jeńildetilgen tártippen qabyldaý jáne azamattyqtan aıyrý máseleleri jónindegi jumys nátıjeleri talqylandy.
Komıssııa otyrysynyń qorytyndysy boıynsha tıisti sheshimder men usynymdar qabyldandy.