Qaraǵandy oblysynyń turǵyndary memlekettik qyzmetkerlerdiń ústinen tıisti orynǵa jedel shaǵym túsire alady. О́ńirimizde barshaǵa belgili WhatsApp júıesiniń jedel jelisi jumys isteıdi. Onyń nómiri – +7 (747) 49-77777.
Jedel jelige eger memlekettik qyzmetter ýaqytymen jasalmaı jatsa, memlekettik organdar memlekettik qyzmet standarttarynda kórsetilmegen qujatty talap etse, memlekettik qyzmetkerler etıkalyq normalardy saqtamasa, habarlasýǵa bolady. Sonymen qatar, memlekettik qyzmetke turýǵa baılanysty shaǵymdar qabyldanyp, suraqtarǵa jaýaptar beriledi. Jemqorlyq oqıǵalary týraly da osy telefonǵa habarlaýǵa bolady.
WhatsApp arqyly joldanǵan habarlar Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamenti men «Qaraǵandy oblysynyń Azamattyq Alıansy» qaýymdastyǵy» ZTB birlesip júzege asyryp otyrǵan «Azamattyq baqylaý» jobasynyń aıasyndaǵy qoǵamdyq qabyldaý ornyna kelip túsedi.
Qoǵamdyq qabyldaý ornynyń músheleri habarlasqandarǵa tegin konsýltasııalyq qyzmet kórsetip, qajet bolǵan jaǵdaıda olardyń quqy men erkindigin qorǵaýǵa shara qoldanady.
– Qabyldaý ornyna barý úshin halyqtyń bári Qaraǵandyǵa arnaıy kele almaıdy. Solardyń ótinish-tilekteri tıisti oryndarǵa tezirek ári tıimdi jetýi úshin osy jelini iske qosyp otyrmyz, – deıdi qoǵamdyq qabyldaý ornynyń qyzmetkeri Tatıana Savıskaıa.
Bir eskertetin jaǵdaı, aty-jónin jasyrǵandardyń aryz-shaǵymdary qaralmaıdy. Eger, mysaly, memlekettik qyzmetker etıkalyq normalardy buzǵan bolsa, onyń ústinen shaǵym túsirýshi qoǵamdyq qabyldaý ornyna kelip, ózi jaıly málimetterdi kórsetip, ótinish jazýy kerek. Al eger azamat jemqorlyq deregi týraly habarlaıyn dep tursa, qoǵamdyq qabyldaýǵa kelýi mindetti emes. Biraq, báribir ózi týraly málimetter qaldyrýy tıis. Alaıda, onyń aty-jóni qupııa saqtalady, jemqorlyq deregimen ustalǵan adam ózin kimniń kórsetkenin eshqashan da bile almaıdy. Sonymen birge, qyzmettik kólikterdi jumys ýaqytynan tys kezde paıdalanýdyń nemese memlekettik qyzmetkerler tarapynan bolǵan basqa da zań buzýshylyqtardyń foto, beınematerıaldaryn jiberýge bolady. Qazir kez kelgen adamnyń qaltasynda túrli fýnksııaly telefon júretinin eskersek, qyzmettegi adamdardyń óz jumysynda shekten tys shalqaqtamaı, «aqyryn júrip, anyq basýyna» týra keledi.
Qaırat ÁBILDINOV,
«Egemen Qazaqstan»
QARAǴANDY