Keshe Qarjy mınıstrliginde Qazaqstan-Izraıl saýda-ekonomıkalyq yntamaqtastyq jónindegi komıssııasynyń 7-shi otyrysy ótti. Onda ózara saýda-sattyqtyń qazirgi jaı-kúıi men kólemi talqylandy.
Komıssııany Qazaqstan tarapynan Qarjy mınıstri Baqyt Sultanov, Izraıl tarapynan Izraıl memleketiniń Qorshaǵan ortany qorǵaý jáne Ierýsalım men dıaspora isteri jónindegi mınıstri Zeev Elkın basqardy.
Otyrys aıasynda Qazaqstan men Izraıl arasyndaǵy saýda, kásipkerlik pen ınvestısııa, aýyl sharýashylyǵy, densaýlyq saqtaý, aqparattyq-kommýnıkasııalyq tehnologııalar salasyndaǵy ekijaqty yntymaqtastyqtyń ózekti jáne perspektıvaly baǵyttary, sondaı-aq, Izraıl memleketiniń Premer-mınıstri B.Netanıahýdyń Qazaqstan Respýblıkasyna sapary barysynda ekijaqty qujattardy qol qoıýǵa daıyndaý máseleleri qaraldy.
Sondaı-aq, taraptar eki memleket arasyndaǵy saýda-ekonomıkalyq qatynastardy nyǵaıtý mańyzdylyǵy men qajettiligin bekitti.
2016 jyldyń 9 aıy ishindegi Qazaqstannyń Izraılmen taýar aınalymy kólemi 236,9 mln AQSh dollaryn qurady. Bul óz kezeginde ótken jyldyń osyǵan sáıkes kezeńimen salystyrǵanda 1,3 paıyzǵa az. Bıyl saýda aınalymyndaǵy eksport kólemi – 196,9 mln AQSh dollary, ımport 40 mln AQSh dollary boldy. Saýda-sattyqtyń bulaısha azaıyp ketýine baılanysty ony damytý qajettigin aıtyp, taraptar Eýrazııalyq ekonomıkalyq odaq pen oǵan múshe memleketter jáne Izraıl memleketi arasyndaǵy erkin saýda aımaǵy týraly kelisim jasasý boıynsha kelissózderdi bastaýdyń mańyzdylyǵyn atap ótti.
Sonymen qatar, densaýlyq saqtaý salasyndaǵy yntymaqtastyqty jandandyrý, atap aıtqanda, qazaqstandyq mamandardyń Izraıldiń aldyńǵy qatardaǵy medısına ortalyqtarynda biliktiligin arttyrý jáne Izraıl mamandarynyń qatysýymen sheberlik-synyptar ótkizý boıynsha ýaǵdalastyqqa qol jetkizildi.
Izraıl taraby aýyl sharýashylyǵy salasyndaǵy yntymaqtastyqty damytýǵa qyzyǵýshylyq tanytty. «Úshqońyr» tamshylatyp sýarý jobasy boıynsha Qazaqstan-Izraıl ortalyǵyn halyqaralyq ortalyqqa aınaldyrý, sondaı-aq, Qazaqstanda demonstrasııalyq ferma qurylysy boıynsha birlesken konsorsıým qurýǵa erekshe nazar aýdaryldy.
Dınara BITIKOVA,
«Egemen Qazaqstan»