Qazaqstan Respýblıkasynyń Tuńǵysh Prezıdenti – Elbasynyń kitaphanasynda Tuńǵysh Prezıdenti kúnine jáne el Táýelsizdiginiń 25 jyldyǵyna arnalǵan kórmelerdiń ashylý rásimi ótti.
Oǵan Memlekettik hatshy Gúlshara Ábdiqalyqova, Qazaqstan Respýblıkasy Prezıdenti Keńsesiniń basshysy – Qazaqstan Respýblıkasynyń Tuńǵysh Prezıdenti – Elbasynyń kitaphanasy dırektorynyń mindetin atqarýshy Mahmut Qasymbekov, Parlament depýtattary, saıası jáne qoǵam qaıratkerleri, memlekettik organdardyń ókilderi qatysty.
«Táýelsizdik jolynyń shırek ǵasyrlyq belesinde elimiz álemdik qaýymdastyqta ekonomıkasy damyǵan, qazirgi zamanǵy órkenıetti memleket retinde qalyptasty. Elbasy Nursultan Nazarbaev belgilegen «Qazaqstandyq joldy» birlik pen turaqtylyqtyń aıshyqty úlgisi retinde tórtkúl dúnıe moıyndady. Kópetnosty halqymyzdyń birligi men yntymaǵy arqasynda eldiń Táýelsizdik tuǵyry bekidi. Búginde terezesi teń, keregesi keń Táýelsiz Qazaqstannyń tolaıym tabystary men jetistikteri tamyrlasyp jatyr», – dedi Memlekettik hatshy.
Sonymen qatar, ol Táýelsizdiktiń shırek ǵasyrlyq mereıtoıyndaǵy eleýli mereke – ol Tuńǵysh Prezıdent kúni ekenin atap ótti. Gúlshara Naýshaqyzynyń aıtýynsha, bul kúnniń respýblıka men halyqaralyq qaýymdastyq úshin tarıhı jáne mádenı mańyzy aıryqsha. Bul kúni shara qonaqtarynyń nazaryna 8 kórme usynyldy. Máselen, «Elbasy joly» kórmesine 50-den astam muraǵat qujattary qoıylǵan. Olar Prezıdenttiń batyl bastamalarynan jáne Táýelsiz eldiń damý tarıhynan syr shertedi. Al «Táýelsiz Qazaqstan – tuǵyrly el» kórmesi eldiń shırek ǵasyrdaǵy áleýmettik-ekonomıkalyq turǵydaǵy qaryshtap damýynyń, álem tanyǵan memleket retinde qalyptasýynyń, eńseli elordany gúldendirýdiń kezeńderimen tanystyrady. Mundaǵy ekspozısııaǵa 50-ge jýyq fotoqujat qoıylypty. Sondaı-aq, sharaǵa qatysýshylar Elbasy kitaphanasyndaǵy asa qundy 550 jınaqpen 3 kitap kórmesi arqyly tanysty. Bulardan bólek, «Uly Dala eli» dep atalǵan kórme de jurtshylyqtyń qyzyǵýshylyǵyn arttyrdy. Onda Qazaqstannyń Sýretshiler odaǵynyń múshesi Nurjan Qarymsaqovtyń eldiń 25 jyldaǵy tabystary men jetistikterin qylqalammen sóıletken 36 tól týyndysy el nazaryna usynyldy.
Bul kúni sondaı-aq, Qazaqstan Respýblıkasy Prezıdentiniń Teleradıo kesheni ázirlegen «Tuńǵysh-Pervyı» derekti fılmder toptamasynyń alǵashqy fılmi kórsetildi. Ol – «Faktor Lıderstva» derekti fılmi.
Láıla EDILQYZY,
«Egemen Qazaqstan»
Sýretterdi túsirgen: Erlan OMAROV