2013 jyly 14 qańtarda alǵash ret Parlament Spıkeri bolyp saılanǵan Halıma Iаkob - Sıngapýrdaǵy Parlament Spıkeri bolǵan alǵashqy áıel.
"Astana EKSPO-2017 halyqaralyq kórmesiniń ashylýyna kelý men úshin úlken mártebe. EKSPO kórmesin ótkizý - memleket jetekshileriniń ulttyq mádenıet pen ınnovasııany álemge pash etýge umtylysynyń jarqyn kórinisi. Prezıdent Nazarbaevtyń dana basshylyǵymen 2050 jylǵa qaraı osy el damyǵan 30 eldiń qataryna kiretinine senimdimin", dedi Parlament tóraıymy.
Sondaı-aq Halıma Iаkob kórmeniń ıdeıasy retinde "Bolashaq energııasy" tárizdi ózekti taqyryp tańdalǵanyn qoldaıtynyn aıtty. "1991 jyly Qazaqstanǵa Sıngapýr Respýblıkasynyń birinshi premer-mınıstri Lı Kýan Iý myrza keldi. Sol kezden bastap memleketter arasynda tyǵyz baılanys ornaǵan. Eki memleket ózara ekonomıkalyq baılanystardy nyǵaıtýda. Sondaı-aq Sıngapýr bilim men memleket basqarýdy damytý suraqtary boıynsha Qazaqstanmen seriktestikti odan ári damytqysy keledi", dedi Sıngapýr Parlamentiniń Spıkeri.
Sıngapýr pavılony alty aımaqtan turady. Ony memlekettiń jetekshi sáýletshileriniń biri Rendı Chen jasaǵan. Pavılon qonaqtar nazaryna eń jańa tehnologııalardy usynady. Mysaly, qýatty az tutynatyn úıler, bıik ǵımarattarǵa tiginen óriletin jylyjaılar, sý qoımalarynda qoldanýǵa arnalǵan júzetin kún batareıalary.
Gúlnur Qýanyshbekqyzy,
"Egemen Qazaqstan"
Sýretterdi túsirgen Erlan Omarov,
"Egemen Qazaqstan"