Fılmdi Sh.Aımanov atyndaǵy «Qazaqfılm» kınostýdııasy men qytaılyq «Shineworks Pictures» jáne «China film coproduction corporation» kompanııalary birlesip túsiredi. Byltyr «Kompozıtor» atty kórkem fılmdi birlesip túsirý, qarjylandyrý jáne birlesip paıdalaný týraly kelisimge qol qoıylǵan. «Qazaqfılm» AQ vıse-prezıdenti Serik Jubandyqov fılmniń 80 paıyzy Almatyda, al 20 paıyzy Qytaıda túsiriletinin, degenmen montajdaý, kompıýterlik grafıka jaǵymen qytaı tarapy aınalysatynyn baıandady. «Fılm túsirý ońaı. Qarjy máselesi, prokat jaǵy qıyn. Biz fılmniń smetasyn teń bólip aldyq. Eki jaq ta fılmdi túsirý úshin elý-elý paıyzdan qarjy shyǵarady. Keler jyly sáýirde fılm túsirilip bitedi. Maqsatymyz – Qytaı naryǵyna shyǵý. Fılmniń Qytaıdaǵy prokatyna Pekın qalalyq partııa komıteti kómektesetin bolady», dedi ol. «Kompozıtor» atty kórkem fılmge qos kompozıtor Baqytjan Baıqadamov pen Sı Sınhaıdyń dostyǵy arqaý etip alynǵan. Sı Sınhaı – Qytaı Halyq Respýblıkasynyń Halyq kompozıtory ataǵyna ıe bolǵan, qysqa ǵana ǵumyrynda 300-den asa shyǵarma týdyrǵan dara talant ıesi. Ekinshi dúnıejúzilik soǵys kezinde saıası qýǵyn-súrgin kórgen ol ómiriniń sońǵy jyldaryn Qazaqstanda ótkizgen. Qazaqtyń kórnekti kompozıtory Baqytjan Baıqadamovpen dos bolǵan. Durysy, Sı Sınhaıdy ashtyq, qaıyrshylyq kúıden qutqaryp, qaıtadan shyǵarmashylyq ortaǵa oralýyna Baqytjan Baıqadamovtyń septigi tıgen. Atalǵan sharaǵa Mádenıet jáne sport mınıstri Arystanbek Muhamedıuly, QHR Baspasóz, kıno, radıo, telehabar máseleleri boıynsha memlekettik ákimshiliginiń mınıstri Ne Chensımen birge eki taraptyń da kınogerleri, ártisteri qatysty. Aıta keteıik, atalmysh fılmniń rejısseri – Sherızat Iаqub, qoıýshy rejısseri – Sábıt Qurmanbekov. Olardan bólek basty rólderdi somdaıtyn Hý Djýn, Berik Aıtjanov jáne Altynaı Nógerbek te sharada qonaq retinde boı kórsetti.
Aıgúl SEIILOVA, «Egemen Qazaqstan»
Sýretti túsirgen Erlan OMAROV, «Egemen Qazaqstan»