Ol Batys Qazaqstan oblysyndaǵy «Egemen Qazaqstan» gazetine menshikti tilshi bolyp táýelsizdiktiń alǵashqy jyldarynda kelgen edi. 24 jyl boıy sonda qyzmet atqardy. Osy tusta sırek kezdesetin bir jaıtty aıta ketken jón sekildi. Bul bir óńirde 75 jylǵa jýyq ýaqyt ishinde gazettiń úsh tilshisi ǵana qyzmet atqarǵan eken. Batys Qazaqstan oblysy 1932 jyly qurylǵan. 1942 jyly oblysqa alǵash ret Musa Hatelov menshikti tilshi bolyp taǵaıyndalypty. Ol kisi bul jumysty 1975 jylǵa deıin úzdiksiz 33 jyl boıy atqaryp kelgen. Odan keıin bul jumysty búgingi tilmen aıtqanda Pavlodar oblysynan Oralǵa rotasııalyq jolmen aýysqan Boranǵalı Yrzabaev 1992 jylǵa deıin jalǵastyrǵan. Ol zeınet demalysyna shyqqan soń oblystaǵy menshikti tilshilikti Temir Qusaıynnyń enshisine tıip, 2017 jyldyń qańtaryna deıin atqardy. Sodan keıin ol óziniń aldyndaǵy izashar aǵasy Boranǵalı Yrzabaev sekildi Oraldan Aqtóbege rotasııalyq tásilmen aýystyryldy. Bir oblystan ekinshi oblysqa tilshilerdi aýystyrý úrdisi burynnan bar úrdis ekenin aıta ketsek deımiz. Temirdiń boıynda qalyptasqan jaqsy adamı qasıet bar. Soǵan dáıek keltirer bolsaq, ol aldyndaǵy eki áriptesi dúnıeden ótkende olardy sońǵy saparǵa attandyrý sharalaryn múltiksiz atqarǵanyn jurtshylyq árkez eske alyp júredi. Boranǵalı Yrzabaev turǵan úıge eskertkish taqta qoıý sharasyna uıytqy bolyp, kózi tirisinde shyǵaryp úlgere almaı ketken óleńder jınaǵyn Oral qalasyndaǵy «Dastan» baspasynan shyǵaryp berýi onyń kisiligi men kishiligin tanytady. «Salttary múlde iri eken, Azamattary da iri eken» (M.Maqataev) degendeı, osy arada Jaıyq boıyn jaǵalaı otyrǵan jurttyń ózindik bir úlgisi baryn aıta ketsek deımiz. Ol qazaqy qalypty buzbaı, ulttyq ónegeni saqtaý, úlken-kishi arasyndaǵy ádemi syılastyq, syrttan kelgen adamdy, «Qosh keldińiz!» dep jadyraı qarsy alyp, «Qosh kelip turyńyz!» dep shyǵaryp salý, el ardaqtylaryn árkez qurmet tutý, talanttardy alaqanda aıalaý, yntymaqqa uıý, ózge de asyl qasıetter kimdi de bolsa marqaıtpaı qoımaıdy. Aınymas dos, adal baýyr etip jiberedi. Mundaı jaqsy qasıet bizdiń áriptesimizdiń ón boıynda molynan. Kóńili kirsiz, oıy tunyq, aıtar sózi bolsa irkip qalmaı, aldyńa jaıyp salatyn Temir aldyndaǵy aǵalaryna, izinen ergen inilerine izeti bólek ekenine talaı kýá bolǵanymyz bar. Onyń ádemi dálelin de alda keltirdik. Gazet úrdisinde jedeldik degen uǵym bar. El ómirindegi eleýli oqıǵany kún aralatpaı oqyrmanǵa jetkizýdi básekelestik dese de jarasady. Osy básekelestikke tótep bergen jýrnalıstiń qashanda bedeli bıik, abyroıy joǵary. Tipti, bul iste kimniń júırik, kimniń shaban ekeni de tarazylanady. Ásirese, kókeıkesti taqyryptardy tap basyp aıtý, jaqsy jumysty jarqyratyp tanystyrý, áttegenaılardyń aldyn alýdy eske salý – bári de jýrnalıstiń sheberligine baılanysty. Bul turǵydan kelgende, Temir Qusaıyn qamshy saldyra qoımaıdy. Qaı jerde júrse de bardy bar, joqty joq dep jazýdy mindet sanaıdy. Qalamy júırik jýrnalıst retinde Jaıyq jurtyna tanylǵan áriptesimiz kótergen ár taqyryp nazardan tys qalyp kórgen emes. Osyndaı ushqyrlyǵy gazet taralymynyń artýyna da yqpalyn tıgizip kelgeni belgili. Máselen, 2004-2008 jyldary respýblıkada turǵyn úı baǵdarlamasy qabyldanyp, barlyq óńirlerde buǵan qatysty qyzý ister bastalyp ketken kezde Temir Qusaıyn oblystaǵy osy istiń jaı-kúıi jóninde tereń jýrnalıstik zertteý júrgizip, «Sapaly joba bolmasa, sáýletti qurylys ta joq» degen saraptamalyq maqala jazdy. Munda avtor Oral qalasynda memlekettik turǵyn úı baǵdarlamasynyń júıesiz júrgizilip otyrǵanyn synǵa aldy. Kóp keshikpeı osy maqalaǵa sáıkes Batys Qazaqstan oblysy ákimdiginiń keńeıtilgen alqa májilisi ótkizilip, «Egemen Qazaqstan» gazetinde kóterilgen máseleler oryndy dep tabyldy. Ári oblys ortalyǵynda qurylys salýdyń ózgeshe jańa jobasy bekitildi. Gazetke de abyroı ákelgen tilshi maqalasy sol kezdegi gazet basshysy Saýytbek Abdrahmanovtyń tarapynan laıyqty túrde baǵalanyp, syıaqy berildi. El isi, jurt tirligi degende árqashan ádildikti tý etip ustaıtyn azamat keı tusta oblys, qala ákimderiniń de atyna syn aıtyp, oǵan alǵashynda renish bildirgen basshylar artynan túsinistik tanytyp, kemshilikke jasaǵan keńshilikterin túzetip jatatynynan da habardarmyz. Mundaı mysaldar az emes. Temir Qusaıynnyń aýzyn ashsa kómeıi kórinip turatyn, kim-kimge bolsa da qolynan kelgen kómegi men jaqsylyǵyn aıamaıtyn, eldiń bárin dos-baýyr sanaıtyn er kóńildi, júregi jomart jan ekenin alda da aıttyq. О́ziniń jýrnalıstik mamandyǵy men uzaq jyldarǵa jalǵasyp kele jatqan menshikti tilshilik qyzmetine áriptesimiz aq-adal. Oblysqa jýrnalıstik issaparmen barǵanda onyń aınalasynda nebir jyly júzdi azamattardyń júrgenin talaı kórgenbiz. Solardyń keıbireýin eske túsirer bolsaq, B.Baımyrza, S.Orazov, B.Ámirǵalıev, N.Tuıaqov, S.Jangeldıev, R.Orazov, basqa da jany jaısań el jaqsylarymen tanysyp, tanysqan edik. Sonymen qatar, Temir – áriptesterdiń arasynda da ózindik orny bar qalamger. Ol sóz ustaı júrip, ónerdiń de óresin ósirip keledi. Ásirese, án janrynda aqyn Juban Moldaǵalıev pen Ilıa Jaqanovtyń shyǵarmashylyq birliginen týǵan «Edil men Jaıyq» ánin Temir naqyshyna keltire oryndaıdy. Onyń bul ónerine Ilıa aǵanyń súısine qol soqqany áli kúnge esimizde. Qalamy tóselgen Temir Qusaıyn qazir aglomerasııalyq aımaq, respýblıkamyzdaǵy ónerkásibi órken jaıǵan Aqtóbe oblysynyń tynys-tirshiligin gazetimizdiń betinde júıeli túrde kórsetip keledi. Alýan taqyrypty qamtyǵan jetistikterdi, áli de jetildire túsýdi qajetsinetin máselelerdi de júıeli qozǵap júr. Temir Qusaıynnyń jýrnalıstıkadaǵy shyǵarmashylyq eńbegi árkez óz baǵasyn alǵanyn da aıta ketsek, artyqtyq etpeıdi. Ol Prezıdent Jarlyǵymen óńirine «Qurmet» ordenin, «Eren eńbegi úshin» medalin taqsa, Memleket basshysynyń Alǵys hattarymen ár jyldary birneshe dúrkin marapattaldy. Sondaı-aq, Qazaqstan Jýrnalıster odaǵynyń syılyǵynyń ıegeri. Batys Qazaqstan oblysy, Qaztalov aýdanynyń «Qurmetti azamaty». Alty beleske shyqqan áriptesimizge shyǵarmashylyq tabys tilep, búgingi bıigi kemeldikke jalǵasa bersin dep, tegeýrindi degen sózdi Temirge qaratyp, qazaqtyń jyr jampozy Qadyr Myrza-Áliniń aıtqanyn eske salyp, aqyn sózi baǵanyń úlkeni dep bilemiz.
Súleımen MÁMET, «Egemen Qazaqstan»