Qazaqstanda kámeletke tolmaǵandardyń isteri jáne olardyń quqyqtaryn qorǵaý jónindegi komıssııalardyń qyzmeti jańa erejelerge sáıkes qaıta júıelendi. Jańartylǵan tártip qazirdiń ózinde óńirlerde qoldanysqa engizildi, dep jazady Egemen.kz.
Jańa qujat Memleket basshysy Qasym-Jomart Toqaev 2025 jylǵy 30 jeltoqsanda qol qoıǵan «Quqyq buzýshylyqtyń aldyn alý týraly» zańdy iske asyrý maqsatynda 2026 jylǵy 30 naýryzda qabyldanǵan.
О́tken jyldyń kórsetkishteri bul ózgeristiń ózektiligin aıqyn kórsetti. 2025 jyly respýblıka boıynsha 4,1 myńǵa jýyq komıssııa otyrysy ótip, bul 2024 jylmen salystyrǵanda 3,7%-ǵa artqan. Qaralǵan ister sany 26,7%-ǵa kóbeıgen, al ómirlik qıyn jaǵdaıdaǵy otbasylarǵa qatysty isterdiń úlesi 17,1%-ǵa azaıǵan. Qazirgi tańda el boıynsha 274 komıssııa jumys isteıdi.
Kámeletke tolmaǵandardy áleýmettik jeliden shekteý kerek - depýtat
Jańa erejelerdiń basty maqsaty – memlekettik organdar men uıymdar arasyndaǵy ózara is-qımyldy kúsheıtý, sondaı-aq balalardyń quqyqtary men zańdy múddelerin qorǵaý tıimdiligin arttyrý. Qujatta respýblıkalyq deńgeıden bastap aýdandyq jáne aýyldyq deńgeıge deıingi komıssııalardy qalyptastyrý tártibi naqty aıqyndalǵan. Olardyń quramyna bilim berý, densaýlyq saqtaý, ishki ister, áleýmettik qorǵaý salalarynyń ókilderi, psıhologtar, qoǵamdyq uıymdar men bala quqyqtary jónindegi ýákilder engizilgen.
Komıssııalardyń negizgi mindetteri – balalardyń quqyqtaryn qorǵaý jáne qalpyna keltirý, quqyq buzýshylyqtardyń sebep-saldaryn anyqtaý, sondaı-aq qaraýsyzdyqtyń, býllıngtiń, zorlyq-zombylyqtyń aldyn alý.
ChatGPT kámeletke tolmaǵandardy avtomatty túrde anyqtaı bastaıdy
Erejelerde materıaldardy qaraý tártibi, sheshim qabyldaý merzimderi, otyrysqa kámeletke tolmaǵandar men olardyń zańdy ókilderiniń qatysýy, sondaı-aq qoldanylatyn sharalar naqty reglamenttelgen. Sonymen birge ómirlik qıyn jaǵdaıdaǵy balalardy erte anyqtaý, olardy áleýmettik ońaltý jáne qoldaý tetikterine erekshe nazar aýdarylǵan. Bul baǵytta ýákiletti organdar men jaýapty tulǵalardyń jeke jaýapkershiligi kúsheıtildi.
Jańartylǵan erejeler komıssııalar jumysynyń júıeliligi men ashyqtyǵyn arttyryp, kámeletke tolmaǵandar arasyndaǵy quqyq buzýshylyqtardyń aldyn alýdy kúsheıtýge jáne árbir balanyń quqyǵyn keshendi qorǵaýǵa múmkindik beredi.
Aıda Balaeva kámeletke tolmaǵandardyń isteri jónindegi óńirlik komıssııalardyń quramyn jańartýdy tapsyrdy