Memleketimiz qysqa merzimde halyqaralyq qatynastardyń jaýapty sýbektisi retindegi bedelin bekitti. Búginde biz ózekti jahandyq máselelerdi sheshý jáne jańa álemdik tártipti qurý isine belsendi qatysyp qana qoımaı, sol baǵyttarda birqatar bastamalar kóterip, onyń oń sheshilýi jolynda nátıjeli sharýalar atqarýdamyz. Osyndaı belsendi is-árekettiń arqasynda Qazaqstan halyqaralyq arenada turaqtylyqtyń, memleket damýynyń qarqyndy jáne órkendegen modeliniń bastaýshysy retinde laıyqty baǵasyn alyp otyr.
Elbasy N.Nazarbaevtyń tabysty júrgizgen kópvektorly syrtqy saıasaty nátıjesinde elimiz aımaqtaǵy jáne álemdegi saıası, qaýipsizdik, órkenıettik, ekonomıkalyq, ekologııalyq máselelerge qatysty bastamalary oń qabyldanýda. Jahannyń jetekshi elderimen strategııalyq jarasymdy áriptestigi Qazaqstannyń ekonomıkalyq qýatynyń qarqyndy ósimine, syrtqy álemmen saýda-ekonomıkalyq, sondaı-aq, ınvestısııalyq baılanystarynyń damýyna negiz bolýda.
Búgingi tańda Qazaqstan qandaı bastama kóterse de, ol álemniń jetekshi elderiniń basym bóliginiń qoldaýyna ıe bolyp keledi. Munyń jarqyn dálelderiniń biri retinde EKSPO-2017 kórmesin Astanada ótkizý mártebesin álemdik qoǵamdastyqtyń qoldaýymen jeńip alýymyzdy aıtýǵa bolady. Parıj qalasynda 2012 jyldyń 22 qarashasynda ótken Halyqaralyq kórmeler bıýrosynyń EKSPO halyqaralyq bıýrosy Bas assambleıasynyń 152-sessııasy barysynda Qazaqstan usynysyn Bıýroǵa múshe 147 eldiń 103-i qoldap, daýys berdi. Bizdiń básekelesimiz Belgııanyń Lej qalasy 44 daýys jınaǵan-dy. Osylaısha, elimiz usynǵan, durys tańdalǵan «Bolashaqtyń energııasy» taqyryby sarapshylardyń kópshiliginiń kóńilinen shyǵyp, kórmeni ótkizý mártebesine ıe boldyq.
Kórmeniń taqyryby bizdi ǵana emes, kúlli álemdi alańdatyp otyrǵan máselege jatady. О́ıtkeni, qýat kózderiniń jańa balamaly túrlerin tabý men ony keńinen qoldanysqa engizý máselelerine kúlli dúnıe nazaryn aýdarýda. Astana osy saladaǵy eń úzdik álemdik ázirlemeler men trendter kórsetetin tıimdi alańǵa aınalýda. Sonymen qatar, kórme eldiń óndiristik qýaty men ǵylymı bazasyn tehnologııalyq jańǵyrtý jáne ekonomıkany júıeli ártaraptandyrý úshin óte mańyzdy.
EKSPO-2017 halyqaralyq kórme jumysy resmı ashylǵaly beri qarqyndy ótýde. Búginde kelýshilerdiń sany 1 mln adamnan asty. Buǵan deıin kórmeni 20-ǵa jýyq memleket jáne úkimet basshylary tamashalady, áli 10 shaqty memlekettiń basshylary keledi dep kútilýde. Halyqaralyq kórmege 100-den astam memleket pen 20-ǵa jýyq halyqaralyq uıymdar qatysyp, óz pavılondaryn ashyp, «Bolashaqtyń energııasy» taqyrybynda ózderiniń ozyq tehnologııalary men jańa ınnovasııalaryn kópshilikke usynýda.
Jalpy, Qazaqstannyń halyqaralyq dárejedegi mańyzdy is-sharalardy ótkizýdegi tájirıbesi jetkilikti. Buǵan deıin biz EQYU-nyń Astana sammıtin, ShYU, IYU basshylarynyń keńesterin, Astana ekonomıkalyq forýmyn, Álemdik jáne dástúrli dinder lıderleriniń sezin joǵary dárejede ótkizgen bolatynbyz. Endi halyqaralyq kórmeniń resmı jabylýyna oraı Islam yntymaqtastyǵy uıymynyń Ǵylym jáne tehnologııalar boıynsha 1-shi sammıti ótpek. Bul bastamany Elbasymyz byltyr IYU HIII sammıtinde kótergen bolatyn. Sammıtke Uıymǵa múshe 55 eldiń jáne halyqaralyq uıymdardyń ókilderi kelip qatysady dep kútilýde.
Osyndaı qyrýar eńbektiń arqasynda, táýelsizdik jyldary Qazaqstan ekonomıkasyna 130-dan astam mlrd dollar ınvestısııa tartylǵan. Qazaqstan – Ortalyq Azııaǵa kelgen barlyq syrtqy ınvestısııalardyń 80%-dan astamynyń qabyldaýshysy. Árbir iske asyrylǵan ınvestısııalyq joba – qazaqstandyqtardyń ál-aýqatyn arttyrýǵa múmkindik beredi. Investısııalar men ınnovasııalar jańa myńjyldyqtaǵy jańa Qazaqstannyń qozǵaltqysh kúshteri bolyp tabylady. El ekonomıkasyna ınvestısııalardy, ınnovasııalardy jáne jańa tehnologııalardy tartý maqsatynda otandyq dıplomatııa aıtýly nátıjelerge qol jetkizip, tabysty jumysty jalǵastyrýda.
Alǵashqy kúnnen basymdyq berilip, durys tańdalǵan kópqyrly syrtqy saıasatymyzdyń arqasynda, elimiz halyqaralyq qoǵamdastyqta aıtýly tabystarǵa qol jetkizip keledi. Osynaý jetistikterimiz óz kezeginde Qazaqstannyń jańa sapaly deńgeıge kóterilýine jáne álemniń básekege qabiletti, damyǵan 30 eliniń qataryna qosylýyna múmkindik beretin bolady.
Nurlan SEIDIN, saıasattanýshy