EKSPO-2017 kórmesin búginge deıin Ońtústik Qazaqstan oblysynan 1200 oqýshy tamashalaǵan. Shymkent qalalyq bilim bólimi basshylyǵynyń málimetinshe, oqýshylarǵa barlyq jaǵdaı jasalýda. Árbir 10 balaǵa bir jetekshi men 2 dáriger maman bekitilgen. Al olar Astanada Nazarbaev Ýnıversıtettiń jataqhanasyna jaıǵasady. Saıahattyń alǵashqy kúninde oqýshylar kórmeniń basty nysany – «Nurly álem» ulttyq pavılonyn, sheteldikter usynǵan zamanaýı tehnologııanyń jańa jetistikterin tamashalap, energııa-qýat kúshin alatyn tyń joba – jeke aımaqpen tanysty. Ekinshi kúninde elordadaǵy birqatar mádenı oshaqtar – Ulttyq mýzeı men Beıbitshilik jáne kelisim saraıy, «Astana-Báıterek» monýmenti, Tuńǵysh Prezıdent saıabaǵy sekildi aýqymdy nysandardy aralady.
Halyqaralyq kórmege kelgen oqýshylarǵa bes kúndik baǵdarlama bekitilgen. Onda balalar jol júrý bıletteri men 4 mezgil tamaqpen tegin qamtyldy. Al kórmege baryp, ıgi bastamaǵa qatysyp qaıtqan shákirtterdiń bilim men ǵylymǵa, qoǵamǵa degen qurmet-qushtarlyǵy eselengenin baıqaýǵa bolady. «Búkil álem kóz tikken sharaǵa kelgendigimnen bolar, úlken qobaljý ústindemin jáne bul – men úshin mártebe. Alǵan áserimdi sózben aıtyp jetkize almaımyn. Munda sheteldik ónertapqyshtardyń jetistigimen tanysyp, jańa tehnologııanyń keń múmkindikterin saraladym. Bolashaqta ǵalym bolǵym keledi. Elimniń ıgiligi úshin ǵylymı zertteýler júrgizip, damyǵan eldermen terezemiz teń bolýy jolynda qyzmet etý – maqsatym», deıdi №7 mektep-lıseıdiń oqýshysy Ásel Músiretáli.
«Búgin biz toǵyzynshy lekpen keldik. Árbir lek saıyn 150 mektep oqýshysy qamtylady. Barlyǵy – Shymkent qalasynyń balalary. Al 24 shildeden bastap biz oblys boıynsha mektep oqýshylaryn ákelemiz. Ońtústik Qazaqstanda 2 myń oqýshynyń bıletteri de, jol shyǵyndary da bıýdjetten tólenip otyr. Sebebi, ol balalar – áleýmettik jaǵynan az qamtylǵan otbasylardyń músheleri», deıdi týrıstik fırma ókili Ǵanı Nazarbek. Onyń aıtýynsha, EKSPO-ny kórgen balalar úlken áser alyp qaıtady. Energııanyń qalaı jáne qaı jerde óndiriletinin, energııa únemdeýdiń mańyzdylyǵyn túsine bastaıdy. Poıyzben qaıtyp bara jatqanda kórgen-bilgenderin talqylaıdy, tipti óz jobalaryn jasaýǵa qulshynys bildirip jatady.
«Olardy ádeıi áńgimege tartyp, múmkindiginshe suhbattasamyn. Balalar ne túıdi eken, sony bilgim keledi. Olar ıdeıalaryn ortaǵa salady. «Mynany istesem qalaı bolady eken?» dep, tyń týyndylaryn usynatyndar da bar. Sol kezde sapardyń beker ketpegenine kózim jetedi», dep jalǵady sózin Ǵ.Nazarbek.
Ashat RAIQUL, «Egemen Qazaqstan»