Kezinde buǵan keıistik bildirgen Seıdahmet Berdiqulov «Júrsiń-aý bir qıyrda...» atty áńgime jazǵany eriksiz eske túsedi. Sondaǵy «Kote Maharadze ushyrasqan saıyn «Fernandestiń (meksıkalyq kommentator – avtor) g-oo-ly qulaqtan ketpeıdi» dep toqsan mınýt sóıleýge grýzınshesi, orysshasy, nemisshesi jetkende, Fernandestiń sheberlikke sóz tappaıdy, bas shaıqaı beredi. Men oǵan qazaqta Fernandes emes, Kote dostyń ózindeı bir maman bolmaǵanyna tek ózim aıypty adamdaı júregim shanshyp, qysylamyn» degen joldardy oqyǵanda sizdiń de kóńilińiz qulazyp, kókeıińizde kóp oılar oıanary anyq. Jańaǵy jazbanyń jaryq kórgenine otyz jyl ótse de, aıaýly aǵamyzdyń asyl armany áli oryndalmaı turǵany ókinishti-aq.
Janymyzdy bala jastan baýraǵan dúnıe bolǵan soń ba, sporttyq tartys-tardy tamashalaýdan qazir de tartynbaımyz. Baıaǵydaı tún uıqymyzdy tórt bólip, jankúıerlik jasamaǵanymyzben jahandyq jarystardan beriletin tikeleı habarlarǵa oqta-tekte kóz tas-tap qoıatynymyz bar. Telearnalarda kórsetiletin fýtbol, voleıbol, basketbol, hokkeı sekildi oıyn túrleriniń ózine tán órnekterin dóp basyp, kórermen kóńilin kónshitýge jaraıtyn kósheli áriptesterimiz árıne, joq emes. Máselen, anaý Amangeldi Seıithan, Eseı Jeńisuly, Ǵalym Súleımen... Aty-jónderin bóle-jara ataǵan bul inilerim kórgen-bilgenderin kórkemdep-aq aıtady. Biraq «Taıbýryldyń qyryq úsh kúndik kemdigi» báribir baıqalady. Áıteýir birdeńeleri jetispeıdi. Qysqasy, aıyz qandyryp «ańyratpaıdy».
Al endi aýzynan sózi túsip, efırde «ezip» otyratyn keıbir kókmyljyń dáldúrishterdiń daýsyn estigende eki qulaǵyńdy tas bekitip tastaǵyń keledi. Ondaılardyń orynsyz teńeýleri men olaq tirkesterinen ıt súrinip, shoshqa batpaqtaıdy.
Osyndaıda keshegi keńestik kezeńde Odaqqa olja salǵan Sınıavskıı, Ozerov, Maharadze sııaqty saı tasyndaı sańlaqtar oıǵa oralady. Eski kınohronıkalardan erekshe únin emis-emis estigenimiz bolmasa, bizdiń býyn Vadım Sınıavskııdi onsha bilińkiremeıdi. Onyń sheshendik sheberligi jóninde erterekte áıgili fýtbolshy Edýard Strelsovtyń memýarynan («Vıjý pole») oqyǵan edik. «Alańda atoılaǵan 22 oıynshynyń kimder ekenin bilsem jetip jatyr. Teris qarap otyryp-aq reportaj júrgize berem» depti sabazyń myqtylyǵyn salmaqtap. Birtýar tulǵa Ozerovtiń de orny bólek-tuǵyn. Kógildir ekrannan kórsetiletin sporttyq saıystardyń ishine kirip kete jazdaıtyn, jaryqtyq. Jaǵymdy daýysy jarǵaq qulaǵymyzda qaldy. О́zderi de sportshy bolǵan Maıorov, Maslachenko, Eremına jan alyp, jan berisken jarystardyń tabıǵatyn jazbaı tanıtyn.
Kommentatorlardyń ishinde óz basym Kote Maharadzeni aıryqsha jaqsy kóretinmin. Ásirese, Tbılısıdiń «Dınamosy» qatysqan matchtardy maıyn tamyza sýretteıtin. Grýzııanyń mańdaıǵa basqan maqtanyshtary Davıd Kıpıanı, Aleksandr Chıvadze, Vıtalıı Daraselııa sııaqty dara juldyzdardy aspandaǵy aıǵa da, kúnge de teńeıtin. Jáne sonysy jarasyp turatyn. Bilmeıtin bálesi joq. Jankúıerlerdi jalyqtyrmaıtyn. Tappaıtyn sózi taǵy kemde-kem. Mysaly, oıyn bastala salysymen shıelenisip ketken kezderde ázil-shynyn aralastyryp «Ala dop áýe aınalyp jerge túskenshe, men sizderdi komanda quramyndaǵylarmen tanystyra qoıaıyn» deıtinin qaıtersiń. Dıýsseldorfta «Karl Seısty» utyp, Eýropa Kýbok ıeleriniń jeńimpazy atanǵanda tbılısılik dınamoshylardy qýana quttyqtap, «bul grýzın... keshirińizder... Sovet fýtbolynyń tabysy» dep aldymen óz ultyn ulyqtaǵany esimizden keter me?..
1998 jyly Astananyń álemdik tusaýkeser toıynda KSRO men Qazaqstannyń ardager fýtbolshylary kezdesetin, odan beriletin reportajdardy maıtalman Maharadze júrgizetin bolyp kelisildi. Alaıda, densaýlyǵyna baılanysty Kote batona elordamyzǵa kele almady. Sóıtip, bizdiń korıfeı kommentatordy júzbe-júz kórsek, ıntervıý alsaq degen oıymyz oryndalmaı qaldy. Jol túsip, Tbılısıge barǵanymda jan jary, ataqty teatr jáne kıno akteri Sofıko Chıaýrelı ekeýi turǵan úıdegi mýzeıdi tamashalaýdyń da sáti túspedi. Onyń esesine Kote kókem talaı reportaj júrgizgen, Meshı men Metrevelı oıqastaǵan Borıs Paıchadze atyndaǵy stadıonǵa soǵyp, jaıqalǵan jasyl alańyna taban tıgizdim...
Qazaqtyń mańdaıyna qaıran Kotedeı bir kommentator biter kún qashan týar eken?!
Talǵat BATYRHAN, «Egemen Qazaqstan»