Qazaqstan Respýblıkasynyń Prezıdenti Ákimshiliginiń kelisimimen Almaty qalasy ákiminiń orynbasary bolyp Murat Dáribaev taǵaıyndaldy, dep habarlaıdy qalalyq ákimdik.
Buǵan deıin ákimniń orynbasary bolǵan Rýmıl Taýfıkov basqa jumysqa aýysady.
Almaty ákimi Baýyrjan Baıbek Rýmıl Taýfıkovke atqarǵan jumysy úshin alǵysyn bildirdi, keıin belgili bolatyn jańa qyzmetine tabys tiledi.
Atap óterlik jaıt, Rýmıl Taýfıkov jolaýshy kóligi jáne avtomobıl joldary basqarmasyna basshylyq jasaı otyryp, qalanyń kólik qurylymyn reformalaýdy belsendi júrgizdi; jalaqy jónindegi qaryzdy 1 mlrd. teńgege azaıtyp, jumyspen qamtý jáne mıgrasııa máselesimen aınalysty. Tótenshe jaǵdaılar departamentimen birge tótenshe jaǵdaılardyń aldyn alý jáne joıý, morendi kólderdiń taıazdanýyn boldyrmaý barysynda qomaqty jumystar júrgizdi; halyqty jumyspen qamtý jáne áleýmettik baǵdarlamalardy júzege asyrý boıynsha utymdy sheshimder qabyldady; densaýlyq saqtaý basqarmasyna basshylyq jasaı otyryp, mindetti medısınalyq saqtandyrý júıesin engizýge zor yqpal etti.
Almaty ákiminiń jańa orynbasary bolyp buǵan deıin «Almaty» áleýmettik-kásipkerlik» UK» AQ-y basqarmasynyń tóraǵasy qyzmetin atqarǵan Murat Dáribaev taǵaıyndaldy.
Qala ákiminiń jańa orynbasary mamandyǵy boıynsha ınjener-qurylysshy, ekonomıst, Almaty avtojol ınstıtýty men T.Rysqulov atyndaǵy Qazaq ekonomıkalyq ýnıversıtetin tamamdaǵan.
Túrli jyldary Qostanaı oblysy ákiminiń orynbasary, QR Prezıdenti Ákimshiliginiń memlekettik ınspektory, QR Indýstrııa jáne saýda mınıstrliginiń ónerkásip Komıtetiniń tóraǵasy, QR Prezıdenti Ákimshiligi áleýmettik-ekonomıkalyq saraptama bólimi meńgerýshisiniń orynbasary, «Búrkit» Memlekettik avıakompanııa» RMK dırektorynyń birinshi orynbasary, QR Prezıdenti Ákimshiliginiń Qaýipsizdik Keńesi Hatshylyǵynyń bas ınspektory, apparat basshysy, QR Indýstrııa jáne saýda mınıstrligi kásipkerlikti damytý departamentiniń dırektory, QR Tabıǵı monopolııalardy retteý jónindegi Agenttiktiń kólikti retteý jáne telekommýnıkasııa jónindegi departament dırektory, QR ındýstrııa jáne saýda mınıstrligi shaǵyn bıznesti qoldaý jónindegi Komıtet tóraǵasynyń orynbasary, QR Prezıdenti Ákimshiligi áleýmettik-ekonomıkalyq saraptama bóliminiń sektor meńgerýshisi jáne basqa da qyzmetterdi atqardy.
Atap óterlik jaıt, Murat Dáribaevtiń basshylyǵymen «Almaty» áleýmettik-kásipkerlik» UK» AQ-y 2016 jyldyń qorytyndysy boıynsha alǵash ret 3,4 mlrd teńge kóleminde paıdaǵa qoljetkizdi. Sońǵy jyly 423,8 mln teńge salyq tólendi, al 2015 jyly tólengeni nebári 41,7 mln. teńge bolatyn. ÁKK-niń 2017 jylǵy alǵashqy jartyjyldyǵynyń qarjy-ekonomıkalyq qyzmetiniń aldyn ala jasalǵan qorytyndysy boıynsha 611,4 mln. teńge kóleminde tabys túsken, al buǵan utymdy basshylyqtyń arqasynda qol jetti.
Sońǵy 2 jyl ishinde ÁKK ekologııa (avtotransportty gazǵa kóshirý), jol qaýipsizdigin qamtamasyz (kameralar) etý, abattandyrý jáne basqa máseleler boıynsha ınvestısııalyq jobalardy belsendi túrde júzege asyrdy.