Jambyl oblysynda aýa-raıynyń kúrt buzylyp, qalyń qar túsýine oraı óńir basshysy Erbol Qarashókeevtiń tapsyrmasyna sáıkes joldardy tazalaý jáne qysqy kútip-ustaý jumysy qyzdy, dep habarlaıdy Egemen.kz.
Sońǵy bir-eki kúnniń bederinde tutas qyz mezgilinde jaýmaǵan qar jaýdy. Tabıǵattyń tosyn minezine saı jambyldyq sheneýnikter de jedel iske kirisip jatyr.
Resmı málimetke súıensek, jergilikti mańyzy bar avtojoldardy qysqy jaǵdaıda ustaýǵa 21 merdigerlik uıym tartylyp, 178 birlik arnaıy tehnıka jumyldyryldy. Oblys boıynsha aldyn ala daıyndalǵan 14 925 tonna qumnyń 9 658 tonnasy jáne 1 500 tonna tuzdyń 920 tonnasy qoldanysta bar.
Oblystyq mańyzy bar avtomobıl joldaryna qyzmet kórsetý úshin 11 merdigerlik uıymmen kelisimshart jasalǵan. Qazirgi ýaqytta olardyń qorynda 5 350 tonna qumnyń 3 477 tonnasy jáne 535 tonna tuzdyń 340 tonnasy saqtaýly. Qysqy jumystarǵa 85 birlik jol tehnıkasy men arnaıy jabdyqtar tartylǵan.
Aýdandyq mańyzy bar joldardy kútip-ustaýǵa 10 merdigerlik uıym jaýapty. Bul baǵytta 93 birlik arnaıy tehnıka jumys istep jatyr. Taraz qalasynyń kóshe jelilerin qysqy kútip-ustaý jumystaryn «Jasyl El-Taraz» JShS júzege asyrady. Qazirgi tańda mekeme kúsheıtilgen rejımge kóshken. Seriktestiktiń qoımasynda 2 600 tekshe metr qum jáne 1 530 tonna tuz qory bar. Jumysqa 50 birlik tehnıka men arnaıy jabdyq jumyldyrylǵan. 300-den astam qyzmetker jumys istep jatyr.
Conymen birge joldardy tazalaý jumystaryna qurylys kompanııalarynyń tehnıkalary tartylǵan. Qajet bolǵan jaǵdaıda qosymsha aýyr tehnıkany jalǵa alý úshin qosalqy uıymdarmen kelisimsharttar jasasý qarastyrylǵan.
Eske salaıyq, 11 aqpanda elimizde qarly boran, kóktaıǵaq, qatty jel bolǵan edi.