Shabandozdar bes shaqyrymdyq jorǵa jarysy, jeti shaqyrymdyq qunan báıge, jáne 21 shaqyrymdyq alaman báıge boıynsha básekege tústi. Respýblıkalyq jarysqa elimizdiń 14 oblysy men Astana jáne Almaty qalalarynan sportshylar baq synady. Alaman, qunan báıge jáne jorǵa jarysyna 13 oblys pen Astana jáne Almaty qalalarynan ár qashyqtyqqa 3 attan qatystyrylsa, jarysty uıymdastyrýshy oblys retinde Atyraý oblysynan 5 at synǵa tústi. Jarystyń júlde qory – 51 mln 700 myń teńgeni qurady. Márege birinshi jáne besinshi kelgen bes júldegerge bólip berildi.
Eń alǵash jarys jolyna jeti shaqyrymdyq Qunan báıgege qatysýshy shabandozdar shyqty. Bul synda márege birinshi bolyp Jambyl oblysy, Qordaı aýdanynyń shabandozy aǵylshyn qarageri tuqymynyń atyn mingen Dilmuhamed Jolaýshy keldi. Jankúıerlerdiń qoshemetin ıelengen jeńimpaz shabandozǵa uıymdastyrýshylar jeti mıllıon teńge tabystady. Jeńimpazdan sál ǵana keshigip kelgen qaraǵandylyq Aıhan Tólegenov (4 mıllıon teńge) ekinshi oryn, Almaty oblysynyń shabandozy Ashat Álimjan (2,5 mıllıon teńge) úshinshi oryndy ıelendi. Sondaı-aq, Jambyl oblysynyń shabandozy Azat Ábıir márege tórtinshi kelse (bir mıllıon teńge) jáne Almaty qalasynyń shabandozy Jumataı Aqjol (bes júz myń teńge) úzdik bestikti qorytyndylady.
Qunan báıgeden soń, shabandozdar bes shaqyrymdyq Jorǵa jarysyna qatysty. Bul synda Qunan báıgede ekinshi oryn ıelengen Qaraǵandy oblysynyń shabandozy Aıhan Tólegenov bas júlde men jeńimpazǵa beriletin úsh mıllıon teńgeni qanjyǵasyna baılady. Márege ekinshi bolyp ShQO shabandozy Vıtalıı Rerıh (1,5 mıllıon teńge) kelse, úshinshi Aqmola oblysynyń shabandozy Dmıtrıı Volkov (bir mıllıon teńge) keldi. Tórtinshi jáne besinshi oryndy Almaty qalasynyń shabandozy Jarylqasyn Sabazbekov (jeti júz myń teńge) pen astanalyq E.Chıbısov (500 myń teńge) ıelendi.
Al jankúıerler taǵatsyzdana kútken 21 shaqyrymdyq Alaman báıge jarysyna qatysýshylar jarys jolyna sońǵy bolyp shyqty. Bul báıgege jalpy sany 62 shabandoz qatysty. Sonyń 40-qa jýyǵy tolyq 21 shaqyrymdy shaýyp ótti. Almaty oblysynyń shabandozy Dııas Jumash 20 shaqyrym boıy úzdik ondyqtyń qatarynda júrip, sońǵy aınalymda qarsylastarynan oq boıy ozyp báıge jeńimpazy atandy. Sondaı-aq, 13 mıllıon teńge qarjylaı marapatqa da ıe boldy. Márege Dııastan keıin kelgen taǵy bir Almaty oblysynyń ókili Erbol Zamýdınuly (7 mıllıon teńge) ekinshi oryndy qanaǵat tutty. Úshinshi oryn pavlodarlyq Ibragım Bóbekbaıǵa (5 mıllıon teńge) buıyrdy. Al tórtinshi jáne besinshi oryndy Almaty oblysynyń shabandozy Bóbekbaı Dinmuhamed (3 mıllıon teńge) pen qostanaılyq Kırıll Zastejko (2 mıllıon teńge) mise tutty.
Báıge sońynda jarys jeńimpazdary men júldegerlerin Mádenıet jáne sport mınıstri Arystanbek Muhamedıuly, Aqparat jáne kommýnıkasııalar mınıstri Dáýren Abaev, Astana qalasynyń ákimi Áset Isekeshev pen Atyraý qalasynyń ákimi Nurlan Noǵaev marapattady.
Álı BITО́RE, «Egemen Qazaqstan»