Tomomı Inada Ońtústik Sýdandaǵy bitimgerlerdiń kúndelik jazbalaryn jurtshylyqtan jasyrý máselesi boıynsha mınıstrlik júrgizgen tergeý jumystarynyń nátıjelerin málim etip, qujattardy jarııalaý jónindegi erejeniń buzylǵanyn rastady.
«Qorǵanys mınıstri retinde bolǵan oqıǵaǵa jaýapkershilikti óz moınyma alyp, otstavkaǵa ketý týraly sheshim qabyldadym. Japonııa premer-mınıstri Sındzo Abe ótinishimdi qabyldady», – dedi mınıstr.
Sondaı-aq ol budan buryn málimdegendeı, atalǵan qujattar jóninde habarsyz bolǵanyn jáne olardy jasyrýǵa tapsyrma bermegenin atap ótti.
Byltyrǵy kúzde oppozısııa ókilderi qorǵanys mınıstrliginen Ońtústik Sýdandaǵy keń aýqymdy qaqtyǵystar kezinde japon bitimgerleriniń kúndelik jazbalaryn kórsetýdi suraǵan bolatyn. Mınıstrlik О́zin-ózi qorǵaý kúshteriniń qurlyq áskeri ol qujattardy joıyp jibergenin aıtqan. Keıinnen atalǵan qujattar О́zin-ózi qorǵaý kúshteriniń birikken shtabynan tabyldy. Kúndelik jazbalardy jurtshylyqqa jarııalaýǵa daıyndyq júrgizilgeni de belgili boldy. Alaıda, bul áreket mınıstrliktiń odan buryn bergen málimdemesine qaıshy keletin bolǵandyqtan, qujattardy joıý jóninde tapsyrma berilgen kórinedi. Biraq qorǵanys mınıstri ondaı tapsyrma bermegenin alǵa tartady.
Bitimgerlerdiń jazbalary jónindegi másele Tomomı Inada aınalasyndaǵy jalǵyz daý emes. Naýryz aıynda ol 13 jyl buryn jeke bilim berý uıymynda qorǵaýshy bolǵany úshin synǵa ushyraǵan bolatyn. Atalǵan bilim berý uıymynyń jer baǵasyna baılanysty aıla-áreketter júrgizýge, sondaı-aq memleketten zańsyz sýbsıdııa alý amaldaryna qatysy bar ekeni anyqtaldy.
Oppozısııa ókilderi byltyr shilde aıynda Ońtústik Sýdandaǵy qaqtyǵystar kezinde japon áskerıleriniń ómirine tikeleı qaýip tóngen dep esepteıdi. Japonııanyń basqarýshy partııasy bul aqpardy joqqa shyǵarǵanymen, Ońtústik Sýdandaǵy áskerılerdiń qyzmetin toqtatý jóninde sheshim qabyldady.