Elordalyqtardy jeńisimen quttyqtaımyn. «Astanany» jeńý ońaı emes. Biz úshin aýyr match ótti. Oıynshylarym bergen nusqaýlarymnan jańylyp qaldy. Onyń ústine aıyna segiz oıynnan ótkizsek, endi birde azdaǵan úzilis bolyp, úsh aptada eki matchqa qatystyq. Bul da keri áserin tıgizbeı qoımady. Máselen, komandamnyń alǵashqy taımda kórsetken oıyny kóńilimnen shyqpasa, kelesi 45 mınýtta qaýipti sátterdi kóbirek uıymdastyrdyq. Azdaǵan sáttilikter jetspeı jatty. Matchtyń sońynda gol jiberip alǵanymyzǵa ishteı qynjylyp otyrmyn. «Astanaǵa» «Seltıkke» qarsy oıynda sáttilik tileımin!
- Teń oıynǵa kóńilińiz tolar ma edi?
- Olaı aıtýǵa kelmes. Sebebi, «Astananyń» gol salatyn birneshe múmkindigi boldy. «Ordabasynyń» da ekinshi taımda esep ashatyn sátteri bolǵan edi. Elordalyqtar bálkim jeńiske laıyqtyraq shyǵar. Biraq men eshqashan da teń oıyndy qanaǵat tutpaımyn. Ári maqsat etpeımin. Bul matchta oıynnyń rıtmin joǵaltyp alǵanymyzdy baıqadym.
- О́zge oıyndarda «Ordabasy» úsh ortalyq qorǵaýshymen oınaıtyn. Bul joly nege ortalyq qorǵanysty eki adamǵa senip tapsyrdyńyz?
- Biz negizi qorǵanysqa tórt adamdy jaýapty etip qoıǵanbyz. Qos qaptaldy tolyǵymen jabý úshin osyndaı qadamǵa barlym. Qazirgi ýaqytta Patrık Tvýması «Astananyń» eń úzdik oıynshysy bolǵandyqtan úsh adamdy ǵana qoıý qıyndaý boldy. Tvýması ózin alańda qysymǵa almaǵan kezderi jaqsy sezinedi. Sebebi, ol óte jyldam. Ony bos qoısań Partıkti ustaý múmkin emes. Ony barynsha tusaýlap ustaýymyz kerek edi. Negizi biz bul josparymyzdy oryndadyq desek te bolady. Biraq qaperimizde Jýnıor Kabananga da boldy.
- Búgin Samat Smaqov ta, Tańat Nóserbaev ta alańǵa shyqpady. Sebebi nede?
- Samat qazir syrqattanyp jatyr. Matchqa úsh kún qalǵanda qyzýy kóterilip, angınasy ustap qaldy. Al Tańattyń belinde azdaǵan jaraqaty bar.
- «Astana» men «Seltık» arasyndaǵy oıyn jaıly óz oıyńyzdy bildirińizshi.
- Men bilsem, «Seltık» Qazaqstanǵa osymen úshinshi ret keledi. «Astana» úshin eń mańyzdysy Shotlandııada joǵary deńgeıde óner kórsetýi kerek. Ol jaqta jankúıerlerdiń qoldaýyn, qysymǵa qarsy tura alsa, ary qaraı ótetin múmkindigi bar. Elordalyqtarǵa osy maqsatty júzege asyrýlaryn tileımin!
- Gol soǵylardan shamamen 30 sekýnd aldyn oıynshyny almastyrdyńyz. Osyny ózińizdiń taktıkalyq qateligińiz dep esepteısiz be?
- Men olaı oılamaımyn. Bul fýtboldaǵy qarapaıym sátterdiń biri.
Aıan ÁBDÝÁLI, «Egemen Qazaqstan»