Bul oıynda jeńis ońaı kelmedi. «Ordabasy» saýatty túrde qorǵana bildi. Bizge erkindik bere qoımady. Múmkindikterimiz bolǵanmen, paıdalana almadyq. Ekinshi taımda qonaqtardyń gol salatyn sátteri de boldy. Eń bastysy biz jeńiske jettik. Soǵan ishteı rızamyn.
- Aleksandr Mokınge eýrokýboktyq oıynnan keıin demalys berdińiz be?
- Men ylǵı da aıtamyn. Qaramaǵymda úzdik qaqpashylar jınalǵan. Qaısysy daıyn bolsa, ózin jaqsy sezinse, sony alańǵa shyǵaramyn.
- Búgin tizimge Aleksandr Mokın, Marın Anıchıch, Djordje Despotovıch, Roman Murtazaev enbedi. Olardyń bári jaraqat alyp qaldy ma? Sondaı-aq Ivan Maevskıı qosalqy quramda otyrdy.
- Olardyń jaraqaty bar. Tipti, qosalqy quramda otyrǵan Ivan da ózin jaısyz sezinip otyr.
- Ashat Taǵybergen búgin jeńisti julyp aldy dep aıtýǵa bolady. Ol osyndaı erligimen negizgi quramǵa jaqyndaı tústi dep aıtýǵa bola ma?
- Ol kópten beri oınamady. Eń birinshi oǵan óz deńgeıine kelý kerek. Jattyǵý kezinde barynsha tyrysyp júrgenine kýámin. Gol soǵý onyń negizgi jumystarynyń biri. Meniń árbir oıynshym óz isin joǵary deńgeıde atqarýy tıis.
- «Ordabasy» ótken maýsymdy úshinshi orynmen aıaqtady. Bıyl bul orynǵa kim laıyqty dep oılaısyz?
- О́zge komandalarǵa baǵa bergendi unatpaımyn. Maýsym sońynda bári belgili bolady.
- Maýsym da biraz jerine jetip qaldy. «Astananyń» chempıon atanýyna ne kedergi bolady dep oılaısyz?
- О́zimizge ózimiz kedergi bolyp qalýymyz múmkin dep oılaımyn. Qysymǵa shydaı bilip, bárin joǵary deńgeıde ótkerip shyǵýymyz kerek. Qıyn ekeni belgili. Biraq bul fýtbol. Osy oraıda áıgili gollandııalyq Iohan Kroıftyń bir sózi esime túsip otyr. Ol «Barselonanyń» tizginin ustaǵan jyldary oıynshylarynyń ylǵı da jeńiske degen qulshynysy joǵalmaýyn, qarsylastaryn tize búktirip turýǵa yntaly bolýyn qalaǵan edi. Sondyqtan meniń de oıym osy. Sonymen qatar, ary-beri ushaqpen ushyp júrýimiz de jigitterdi sharshatýy múmkin. Biraq fýtbol bolǵannan keıin bárine shydaýymyz kerek.
- «Seltıkke» qarsy oıyn aldyndaǵy «Aqtóbemen» ótetin matchty keıinge qaldyrý kerek pe edi?
- Negizi bul týraly da oılanǵanbyz. Biraq árbir oıyndy shegere berer bolsaq, «Astanaǵa» da jaqsy abyroı ákelmeıdi. Sondaı-aq, matchty keıinge qaldyrý qarsylas komandaǵa da qıyndyq týdyrýy múmkin.
- Osyǵan deıin «Seltık» qazaqstandyq klýbtarǵa qarsy ótkizgen oıyndarda alǵashqy matchty syrt alańda ótkizetin. Bul joly jaǵdaı basqasha. «Astanaǵa» osy jaıt oń áserin beredi dep oılaısyz ba?
- Men osyǵan deıin de birneshe ret aıtqanmyn. Taǵy da qaıtalaıyn. Maǵan bári-bir. Qansha degenmen eki oıyn ótkizemiz. Bul matchta «Seltıkti» favorıt retinde esepteımin. Jylda Eýropa arenasynda óner kórsetedi. Biraq fýtbolda ylǵı da favorıtter jeńe bermeıdi. Aldymen «Aqtóbege» qarsy oıyndy ótkizip alaıyq, sodan keıin shotlandııalyqtardy oılaıtyn bolamyz.
Aıan ÁBDÝÁLI, «Egemen Qazaqstan»