Baspasóz jıynynda yntymaqtastyqtyń negizgi baǵyttary sóz bolyp, aldaǵy josparlar tanystyryldy. Elshiniń aıtýynsha, Qazaqstan men Fransııa arasyndaǵy qarym-qatynastyń naqty 4 baǵyty bar. Eń áýeli, ekonomıkalyq yntymaqtastyqty ártaraptandyrý qajet. Qazirgi tańda eki el arasyndaǵy saýda aınalymy jylyna 3 mıllıard eýroǵa jetip otyr.
Fransıs Etenniń pikirinshe, ekinshi baǵyt – mádenı baılanysty nyǵaıtý. Máselen, joǵarǵy oqý oryndarynyń stýdentterin almastyrý da kún tártibinde tur. Elshi keltirgen derekterge súıensek, qazirgi tańda 650-deı qazaqstandyq stýdent Fransııada bilim alady. Keleshekte olardyń sanyn arttyrý kózdelgen. Sondaı-aq, mádenı is-sharalardy turaqty uıymdastyryp turýdy josparlap otyr. Elshi ánshiler shaqyrar kezde qazaqstandyq aýdıtorııanyń suranysyna nazar aýdaratynyn málimdedi.
«Maýsymda Patrısııa Kaas óneri kórsetip ketti. Aldaǵy ýaqytta ony taǵy shaqyryp otyrmyz. Oǵan qosa, klassıkalyq mýzyka oryndaıtyn orkestrdi Qazaqstanǵa ákelý josparda bar», – degen Fransıs Eten Dımash Qudaıbergenniń talantyna razy ekenin jetkizdi.
Elshiniń sózine súıensek, qarym-qatynastyń úshinshi baǵyty – barlyq deńgeıde saıası dıalog ornatý. Osyǵan sáıkes, eki eldiń basshylary, mınıstrler men parlamentshiler arasyndaǵy ekijaqty saıası dıalog qarqyndy damyp keledi. Úkimetaralyq jáne vedomstvoaralyq konsýltasııalar turaqty uıymdastyrylady. Máselen, bıyl 7 qyrkúıekte Astanada úkimetaralyq komıssııa ótkiziledi.
Fransııanyń «EKSPO-2017» halyqaralyq kórmesindegi pavılony aradaǵy baılanystyń tórtinshi negizgi baǵyty ekenin habarlady Fransıs Eten. Onyń aıtýynsha, «úsh jolaqty el» kórmesin bilim beretindeı, tartymdy, úlgi alarlyqtaı bolýyn nazarda ustaǵan. Sonyń nátıjesi shyǵar, kórme ashylǵaly beri Fransııa pavılonyn 300 myńnan astam meıman tamashalaǵan eken.
Jalpy Fransııa men Qazaqstan arasyndaǵy dıplomatııalyq qarym-qatynas joǵarǵy deńgeıde. «Úsh jolaqty el» Qazaqstan táýelsizdigin alǵash tanyǵan Eýropa elderiniń qatarynda. Sonymen qatar, Qazaqstan – Fransııanyń Ortalyq Azııadaǵy strategııalyq seriktesi. Búginde eki el arasyndaǵy saýdaaınalymy da joǵarǵy deńgeıde. Atap aıtar bolsaq, ýran óndirisi, temir jol lokomotıvteri, tıtan quımalary, munaı, sement, farmasevtıka, sýmen qamtamasyz etý jáne agro-ındýstrııa salalarynda qarqyndy baılanys ornatylǵan. Resmı málimetke súıensek, Fransııa Qazaqstanǵa 13,6 mıllıard eýro qarjy quıǵan eken.