Aıta keteıik, Parlament Májilisiniń depýtaty, Olımpıada chempıony Serik Sápıev Astana áýejaıy aýmaǵyndaǵy avtoturaq baǵasynyń qymbattyǵyna narazylyq bildirip, Astana ákimine shaǵymdanǵan edi.
«Eger kólikti áýejaıdyń jabyq turaǵyna qaldyrsaq, táýligine 2000 teńge tóleımiz, bul qalypty baǵa. Al áýejaı aýmaǵyndaǵy syrtqy avtoturaq orny úshin alǵashqy eki saǵatqa 400 teńge jáne odan keıingi saǵattarǵa 1500 teńge tóleý qajet. Sonda bir táýlikke 33400 teńge tóleıdi ekenbiz», - dep jazdy ol.
Rýstam Halılevtiń aıtýynsha, áleýmettik jelige tarap ketken 30 myń, 50 myń teńgelik shottar óz kólikterin qysqa merzimdik avtoturaqqa uzaq ýaqytqa qaldyryp ketken júrgizýshilerge berilgen.
«Áýejaıda rekonstrýksııalyq jumystar júrgizilgende avtoturaqqa kólikter tegin qoıyldy jáne halyq soǵan dándenip aldy. Kólikterin bizge tastap, bir aptaǵa, bir aıǵa ketip qalyp júrdi. Álbette, bul basqa kelýshilerge yńǵaısyzdyq týdyrady. Tegin eken dep, adamdardyń oıǵa kelgenin isteýi durys emes. Munda tártip bolyp, bul prosesti basqaratyn sáıkes qurylym qajet», dedi R.Halılev.
Biraq kompanııa ókili bilmestikpen asa qymbat baǵaǵa urynǵan júrgizýshilerge keshirim bergenderin habarlady.
«Biz olarmen sóılestik jáne avtoturaq qunyn eki myń teńgelik tarıfpen tóleýdi usyndyq. Olar barlyq erejemen tanystym dep qol qoıdy. Shyn máninde erejeni kórmeı qalǵan, baıqamaı qalǵan júrgizýshilerge túsinistik tanyttyq. Biraq endigide mundaı bilmestikter keshirilmeıdi, barlyq talaptar túsinikti tilde, úlken shrıftpen jazýly tur», dep atap ótti R.Halılev.
Áýejaı tarıfine sáıkes, áýejaı mańyndaǵy qysqa merzimdi avtoturaqta 30 mınýt tegin turýǵa bolady, bir saǵatqa - 300 teńge, kelesi saǵat úshin - 400 teńge, odan keıingi saǵattarǵa 1500 teńgeden tólenýi tıis.
«Jabyq parkıngke keler bolsaq, ondaǵy tarıf óte yńǵaıly, táýligine 2 myń teńge ǵana tólenedi. Tarıf qyzmet kórsetýge ketetin shyǵyndarǵa sáıkes túzilgen. Bálkim, halyq biz jazyp qoıǵan mańyzdy aqparattardy oqymaıtyn shyǵar, bar másele osynda bolyp tur. Túsindirý jumystary júrgizilgen, júrgizilip keledi jáne bolashaqta da júrgizile beretin bolady. Qazir bul parkıng bos tur. Nege kóligin uzaq ýaqytqa tastaıtyndar kúzeti bar arzan parkıngke kelmeıdi?», deıdi AstanaLRT ókili.
Sonymen birge, Rýslan Halılev avtoturaqqa tólem jasaýǵa yńǵaıly jaǵdaı jasaý úshin uıaly qosymsha shyǵarylatynyn habarlady. Qonaqtardy jıi kútip alyp, shyǵaryp salatyndar úshin de arnaıy abonement jasaý qarastyrylǵan.