Elbasy Ulttyq bank tóraǵasy Danııar Aqyshevti qabyldady. Bul týraly akorda.kz habarlady.
Kezdesýde Memleket basshysyna Ulttyq banktiń elimizdiń qarjy sektoryn ilgeriletý jónindegi jumystarynyń qorytyndysy týraly esep berildi.
Qazaqstan Prezıdenti qazir ulttyq valıýtanyń erkin aıyrbas baǵamy saıasatynyń júrgizilip jatqanyn aıtyp, Ulttyq banktiń ınflıasııa ósimine jol bermeý jónindegi mindetin erekshe atap ótti.
Sonymen qatar, D.Aqyshev Nursultan Nazarbaevqa valıýta jáne qarjy naryǵyndaǵy qazirgi ahýal týraly baıandady.
– Jalpy, ahýal turaqty. Qazir tamyz aıynyń basynda ishki jáne syrtqy sıpattaǵy jekelegen faktorlar áserinen bolǵan aýytqýlardan keıin aıyrbas baǵamy turaqtandy. Alańdaýǵa esh negiz joq, – dedi Ulttyq bank tóraǵasy.
Elbasy kezdesý sońynda birqatar naqty tapsyrma berdi.