Akademııanyń oqý jumysy jáne aqparattyq tehnologııalar jónindegi vıse-rektory Áltaır Ahmetovtiń pikirinshe, úmitkerge qoıylatyn talaptar qazirgi zaman aǵymyna laıyq jetildirilgen. Ol mundaı júıeni «Nazarbaev ýnıversıtetinen» keıin ekinshi bolyp qabyldap otyrǵan Memlekettik basqarý akademııasy ekenin aıtady.
«Jańa júıe arqyly bilim alýǵa yntaly memlekettik qyzmetkerdi tańdaýǵa múmkindik mol. Qazirgi qabyldaý emtıhany tikeleı úmitkermen jumys isteýge, onyń qarym-qabiletin baǵamdaýǵa óte qolaıdy», – deıdi Áltaır Ahmetov.
Memlekettik basqarý akademııasyndaǵy bilim júıesi de, baǵalaý da aıtarlyqtaı ózgertilgen. Oqý jyly barysynda stýdentter shetelge baryp, ondaǵy memlekettik qyzmetkerlerdiń tájirıbesin úırenip qaıtady. Sondaı-aq, olardyń eńbekterin baǵalaý túrli deńgeılermen júrgiziledi. Áltaır Ahmetov aıtýynsha, jańa júıe Elbasy Nursultan Nazarbaevtyń «100 naqty qadam» baǵdarlamasynyń 15-qadamyn júzege asyrý boıynsha jasalyp jatyr.
Akademııaǵa oqýǵa túsý úshin úmitker úsh kezeńnen ótedi. Eń áýeli qajetti qujattarymen birge eki shyǵarma qosyp tapsyrady. Birinde yntalandyrý jóninde esse jazsa, kelesi shyǵarmanyń taqyryby mamandyqqa baılanysty. Osy arqyly úmitkerdiń taldamalyq jáne synı oılaý qabileti anyqtalady. Shyǵarmalardy eki sarapshy baǵalaıdy eken. Olarǵa tekseriletin shyǵarmanyń avtory jáne bir-biri týraly aqparat berilmeıdi. Alda-jalda eki sarapshynyń baǵalaýyndaǵy aıyrmashylyq óte úlken bolsa, shyǵarmany úshinshi sarapshy tekseretin kórinedi. Qorytyndy nátıje sodan keıin shyǵady. Al shyǵarma jazýǵa kerekti aqparattyń bári Akademııa saıtynda tur.
Ekinshi kezeńde úmitkerdiń aǵylshyn tilin bilý deńgeıi anyqtalady. Áltaır Ahmetov qazaq tili men orys tili kúndelikti qoldanysta ekenin, sondyqtan álemdik til – aǵylshyn tili tańdalǵanyn aıtady. Bul kezeńde APTIS til baǵalaý júıesi tańdalǵan. Testi ótkizý quzyreti tolyqtaı British Council-ǵa senip tapsyrylypty. Kompıýter arqyly júrgiziletin bul emtıhannyń qorytyndysy Londonǵa jiberilip, nátıje 72 saǵattan keıin belgili bolady. Áıtse de, bul kezeńniń ereksheligi bar. Eger úmitker buǵan deıin IELTS, TOEFL ne APTIS tapsyryp, onyń nátıjesi qoıylǵan talapqa saı bolsa, olar birden kelesi kezeńge ótedi. Sonymen qatar, «Nazarbaev ýnıversıteti» sekildi bilim berý júıesi aǵylshyn tiline negizdelgen joǵarǵy oqý oryndarynyń túlekteri de ekinshi emtıhandy tapsyrýy mindetti emes.
Úshinshi kezeńde arnaıy komıssııa músheleri úmitkermen betpe-bet áńgimelesedi. Onda talapkerdiń kásibı, taldamalyq, kommýnıkatıvtik jáne tulǵalyq qasıetteri baǵalanady. Suhbat erkin formatta, úmitker qalaǵan tilde ótedi eken. Alaıda ol qalǵan eki tildegi suraqtarǵa da jaýap berýge mindetti. Áltaır Ahmetovtiń aıtýynsha, komıssııa quramyna Prezıdent Ákimshiligi, Qaýipsizdik keńesi, qala ákimderi sekildi quzyretti mekeme ókilderi kiredi.
«Talapkerler suhbattasýdyń qalaı ótetininen habardar bolsa da, dál búgingideı emen-jarqyn áńgimelesetinimizdi kútken joq. Osyndaı erkindik arqyly úmitkerdiń búkil qabiletinen habardar bolýǵa múmkindik mol», – deıdi Qaýipsizdik keńesi hatshylyǵynyń sektor meńgerýshisi Sergeı Konovalov.
Basqarý akademııasyna oqýǵa qabyldaý 10 mamandyq boıynsha júrgizildi. Bıyl magıstratýraǵa 120, doktorlyqqa 12 grant bólinipti. Budan bólek, oqý ornynda aqyly túrde de bilim alýǵa múmkindik jasalǵan. Búginde Qyrǵyzstan, Tájikstan jáne Mońǵolııa sekildi elderdiń memlekettik qyzmetkerleri Akademııada tájirıbesin jetildirýge nıet bildirip otyr. Memlekettik basqarý akademııasyna bıyl oqýǵa túskender aldaǵy aptada belgili bolady.