J. Qasymbek Ulttyq ınvestısııalyq strategııa qyzmetiniń mańyzdy baǵyttarynyń biri óńirlik jáne ortalyq deńgeılerde barlyq máselelerdi sheshý úshin ınvestorlarǵa arnalǵan «biryńǵaı tereze» jumysy ekendigine toqtaldy. Qazirgi tańda osyndaı «tereze» qyzmetin Kazakh Invest atqarady.
«Bul ulttyq kompanııa ınvestorlarmen jumystyń basynan sońyna deıin birge jumys isteıtin bolady. Iаǵnı, ol ınvestordy qarsy alady jáne ony qajetti normatıvtik, zańdyq nemese ózge jaǵynan qoldaý kórsetedi, osy jobany iske asyrý kezinde de ári qaraı súıemeldeıtin bolady», - dedi Jeńis Qasymbek.
Mınıstr ınvestorlar negizinen ruqsat qujattaryn alý kezinde, tekseristen ótý barysynda jáne jergilikti óńirlik organdarmen jumys isteý kezinde máselelerge tap bolatynyn atap ótti.
«Sondyqtan da bizde Kazakh Invest-ten ózge, ınvestısııalyq ombýdsmen sekildi ınstıtýt bar, ol – ınvestısııalar jáne damý mınıstri. Biz turaqty túrde úshjaqty kezdesýler ótkizip turamyz, ıaǵnı, ınvestordyń atynan qandaı da bir shaǵym nemese ótinish kelip tússe, biz mınıstrlikke ınvestor men másele baǵyttalǵan tarapty shaqyramyz. Úshjaqty formatta máseleni sheshýge tyrysamyz», - dep túsindirip ótti J. Qasymbek.
Jalpy, mınıstrdiń aıtýynsha, búgingi kúni Kazakh Invest 147 joba boıynsha jumys jasaıdy jáne osy negizdegi túrli máselelerdi sheshý turǵysynan kómek kórsetýmen aınalysady.