J.Qasymbek Memleket basshysynyń tapsyrmasyn oryndaý aıasynda Dúnıejúzilik bankpen birlesip 2018-2022 jyldarǵa arnalǵan Ulttyq ınvestısııalyq strategııa ázirlengenin baıandady. Onda eksportqa baǵdarlanǵan shıkizattyq emes sektorlarǵa tikeleı sheteldik ınvestısııalardy tartýǵa basa kóńil bólingen.
Strategııa tabysty júzege asyrylǵan jaǵdaıda, bes jyl ishinde 2016 jylǵy deńgeıge shaqqanda ekonomıkaǵa tikeleı ınvestısııalardyń jappaı aǵymynyń 26% deıin kezeń-kezeńimen ósýi boljanyp otyr, al tıimdilikti arttyrýǵa, ıaǵnı eksportqa baǵdarlanǵan ınvestısııalar 50% deıin artpaq. Sonymen qatar shıkizattyq emes sektordaǵy negizgi kapıtalǵa ishki ınvestısııalar 46% ósedi dep kútilýde.
Dúnıejúzilik bankpen birlesip tıimdilikti arttyrýǵa baǵyttalǵan basymdyqty salalar tańdaldy, olardy eki topqa bólýge bolady. «Qazir áleýeti bar salalar», ıaǵnı tamaq ónerkásibi, munaı, gaz jáne paıdaly qazbalardy tereńdetilgen óńdeý, sonymen qatar mashına jasaý. Sonymen qatar «perspektıvaly salalar»: AKT, týrızm jáne qarjy salalary.
MJÁ strategııada, ásirese, kapıtal syıymdy ınfraqurylymdyq jáne áleýmettik jobalarǵa TShI-dy tartý úshin negizgi quraldardyń biri retinde aıqyndalǵan. Sonymen qatar qazirgi ınvestorlardy saqtap qalý men qaıta ınvestısııalaýǵa yntalantyrýǵa erekshe kóńil bólinedi.
Ekonomıkalyq múmkindikterin eskerýmen álemniń 36 áleýetti eli anyqtaldy, onyń 11-i biz úshin basymdyqty bolyp tabylady (AQSh, RF, Ulybrıtanııa, Germanııa, Fransııa, Italııa, KHR, Japonııa, Ońtústik Koreıa, Túrkııa, BAÁ). Bul eldiń árqaısysymen jumys isteý úshin SIM-imen birlesip derbes tásilder men naqty is-áreketter jospary jasalady.
Strategııa aıasynda jumys eki baǵytta júrgiziledi:
1) Qazaqstannyń ınvestısııalyq ahýalyn jaqsartý: ınvestısııalyq saıasattyń ashyqtyǵy men boljamdylyǵyn arttyrý, vızalyq jáne kóshi-qon rejımderin jetildirý sharalary, ınvestorlardyń quqyqtaryn qorǵaý salasynda zańnamany jetildirý.
2) Tıimdi operasııalyq sharalardy júzege asyrý jáne ınvestısııalar tartý úshin jańa tásilderdi engizý. Ol úshin ınvestısııalar jónindegi arnaıy ulttyq kompanııa Kazakh Invest quryldy, onyń sheteldik ókildikteri men aımaqtyq fılıaldar jelisi ınvestorlarmen «bir tereze» qaǵıdaty boıynsha jumys isteıdi. Sonymen qatar ınvestısııalyq jobalardyń aqparattyq-monıtorıngtik júıesi engiziledi, ol qandaı da iske asyrylýǵa deıin bir jobalardyń sapaly ári tolyqqandy pysyqtalýynsyz «túsip qalýyn» boldyrmaıdy.
Sonymen qatar Investısııalyq jobalar kartasy engizilip, aqparattyq-monıtorıngtik júıemen baılanystyrylady, reglamenti men jaýapkershilik salalary naqty aıqyndalýymen SIM, sheteldik mekemelermen, salalyq mınıstrliktermen, ulttyq kompanııalarmen, ákimdiktermen ózara árekettesý tetigi engiziledi.