Aýdan ákimi Rahmatildá Rahmanberdıev Elbasy Nursultan Nazarbaevtyń bastamasymen elimizde eleýli is-sharalar atqarylyp jatqanyn, onyń ishinde densaýlyq saqtaý salasyna erekshe kóńil bólinip otyrǵandyǵyn atap ótti. Budan keıin eńbek ardageri Mamet Súleımenov emdeý nysanynyń boı kóterýine atsalysqan azamattarǵa alǵysyn bildirdi.
Qostóbeliterdiń qýanyshymen ǵımarattyń qurylysyn júrgizgen «Binna-K» jaýapkershiligi shekteýli seriktestiginiń dırektory Kerim Atashev ta bólisip, ambýlatorııanyń kiltin aǵa dáriger Ǵalymjan Qaltaevqa saltanatty túrde tabys etti. Budan keıin aýdan ákimi Rahmatildá Rahmanberdıev pen Baızaq aýdandyq ortalyq aýrýhanasynyń bas dárigeri Ryskeldi Saparbekov dárigerlik pýnkttiń lentasyn qıdy. Oblystan, aýdannan arnaıy kelgen qonaqtar bastaǵan aýyl turǵyndary ǵımarat ishine kirip, jańa nysannyń bólmelerin aralap kórdi. Ambýlatorııadaǵy anyqtama, zerthana, ekpe egý, zalalsyzdandyrý, terapııa, pedıatrııa, áıelderge kómek kórsetetin oryn men kúndizgi em-shara kabınetteri tolyqtaı sońǵy zamanaýı qural-jabdyqtarmen qamtylǵan.
Budan keıin aýdan ákimi Sýhambaı aýylyndaǵy 15 kelýshige arnalǵan dárigerlik ambýlatorııanyń da saltanatty ashylýyna qatysty. О́z kezeginde ambýlatorııanyń sımvoldyq kilti mekeme meńgerýshisi Uldana Myrzashevaǵa tapsyryldy.
Keń, ári jaryq, naýqastardy emdeýge barlyq jaǵdaı jasalǵan záýlim mekemeler endigi jerde sapaly medısınalyq kómek jolynda qyzmet etetin bolady.
Hamıt Esaman,
«Egemen Qazaqstan»
Jambyl oblysy