«Samuryq-Qazyna» UÁQ» AQ jáne «Samuryq-Qazyna Kontrakt» JShS uıymdarynyń resmı saıttarynda 64 taýar, jumys jáne qyzmetten turatyn tizim jarııalandy. Atalǵan tizim boıynsha qajet dúnıeni ulttyq kompanııalar budan bylaı tek aldyn ala biliktilik rásiminen ótken uıymdardan satyp alatyn bolady. Qujat aqtyq emes, ol árdaıym tolyqtyrylyp otyrady. Aldaǵy ýaqytta ulttyq kompanııalardyń barlyq satyp alý isteri aldyn ala biliktiligi boıynsha irikteý tizimine engen kásipkerlerdiń arasynda ǵana júrgiziledi.
Myńnan astam jekemenshik qazaqstandyq kompanııa aldyn ala biliktiligi boıynsha irikteýden ótip, «Samuryq-Qazyna» holdınginiń senimdi jetkizýshileriniń pýlyna kirdi. Olardyń arasynda Jańaózen qalasynda ornalasqan, munaı kompanııalaryna qurylys-montaj jumystary boıynsha qyzmet kórsetetin «Nýr-Bars.N» JShS bar. Mańǵystaý oblysyndaǵy bul uıymnyń qarjy dırektory Aınagúl Ahmetdınova jetkizýshilerdi irikteýdiń jańa quralyna qatysty óz oıymen bólisti. «Bizge aldyn ala biliktiligi boıynsha irikteýden ótý ońaı bolǵan joq. Biraq qaıta tapsyrmaı, birinshi retten soń maqsatymyzǵa jettik. Bul óte durys qural dep oılaımyn. Mysaly, biz óz kemshilikterimizdi kórip, olardy túzettik. Tehnıkalyq aýdıt – óte qıyn prosedýra, odan ótý bıznesimizge paıdasyn tıgizdi», dep atap ótti ol.
Aldyn ala biliktiligi boıynsha irikteý rásiminen «Kaztranscom» JShS de ótti. Bul – Internet jelisi, telefon, júıelik ıntegrasııa jáne telekommýnıkasııalyq qural-jabdyqqa tehnıkalyq qyzmet kórsetý sekildi dúnıelerdi usynatyn telekommýnıkasııalyq kompanııa. Holdıngtiń bilikti jetkizýshileriniń pýlyna kirý atalǵan uıymǵa «Samuryq-Qazynanyń» senimdi seriktesi mártebesine ıe bolýǵa múmkindik berdi.
«Iá, aldyn ala biliktiligi boıynsha irikteý – bul úlken jumys, kóp eńbekti qajet etedi. Jalpy alǵanda, biz úlken kúsh salyp qınalmadyq, sebebi, uıymda halyqaralyq standarttarǵa saı menedjment júıesi bar, barlyq bıznes-úderister retke keltirilgen. Tórt halyqaralyq ISO standarty boıynsha sertıfıkattalǵanbyz. Atalǵan qujattardy tapsyrýda qıyndyqtar bolmady», deıdi basqarýshy dırektor – kompanııa fılıaldarynyń qyzmetin úılestirýshi Qarlyǵash Sultanbekova.
Aldyn ala biliktiligi boıynsha irikteý Qordaǵy satyp alý rásimin ótkizýdiń sapasyn arttyrý jáne jumsalatyn ýaqytty ońtaılandyrý maqsatynda engizilip otyr. Jańa mehanızm básekelestikti arttyryp, jalǵan kásipkerler men birkúndik kompanııalar úshin kedergi bolady. Prosesti Holdıngtiń satyp alý júıesiniń damýyna jaýap beretin «Samuryq-Qazyna Kontrakt» JShS júrgizip, baqylap otyrady.
«Samuryq-Qazyna Kontrakt» JShS Aldyn ala biliktiligi boıynsha irikteý departamentiniń dırektory Eldar Doskenovtiń sózine qaraǵanda, senimdi jetkizýshiler tobyn qalyptastyrý halyqaralyq bızneste keń taralǵan eken. Bul irikteýden ótken kásipkerler Holdıngtiń satyp alý jumystaryna kem degende úsh jyl boıy qatysý múmkindigine ıe bolady.
Sarapshy tenderge qatysý úshin satyp alý somasynyń 1%-yna teń qarajat túrindegi qamtamasyzdandyrýdy engizý budan bylaı qajet emes ekenin irikteýden ótken kásipkerlerge arnalǵan taǵy bir oń jańalyq retinde túsindirdi. Mysaly, 500 mln teńgege qyzmet nemese taýar satyp alý isinde joǵarydaǵy soma 5 mln teńgeni quraıdy. Sonymen qatar elektrondy júıe kómegimen «Samuryq-Qazyna» holdınginiń tapsyrys berýshileri ótkizip jatqan satyp alý isteri týraly kásipkerlerdi qulaǵdar qylyp otyrady. «Aldyn ala biliktiligi boıynsha irikteýden ótken úmitker jetkizýshige ár satyp alý boıynsha taǵaıyndaý (saılaý) týraly jarlyq, jarǵy, zańdy tulǵany tirkeý týraly kýálik sekildi standartty qujattar toptamasyn jınaýdyń qajeti joq. Bul notarıaldy kýálandyrýǵa ketetin shyǵyndy barynsha azaıtyp, tapsyrysty oryndaı alatyn uıymdar qyzmetinen orynsyz sebepterge baılanysty bas tartýdyń aldyn alady», dep túsindirdi Doskenov.
Búgingi kúni irikteý júıesinde (www.pko.skc.kz) 6 myńdaı qoldanýshy tirkelgen. Irikteýden ótýdi josparlap otyrǵan úmitker jetkizýshiler «Samuryq-Qazyna Kontrakt» saıtyndaǵy oqytý materıaldarymen tanysa alady.
Ashat RAIQUL, «Egemen Qazaqstan»