Festıval hedlaıneri reseılik belgili Estradarada toby boldy. UFC qorǵaýynda shyǵyp júrgen aralas jekpe-jek óneriniń jaýyngeri jeńilmegen reseılik sportshy Habıb Nýrmagomedov qurmetti qonaq retinde qatysty.
-Festıvaldiń basty mindeti buqaralyq sportty damytý, halyqty sportpen shuǵyldanýǵa shaqyrý, - deıdi oblystyq dene tərbıesi jəne sport basqarmasynyń basshysy Azamat Beket. - Mundaı keń kólemdegi shara Qazaqstanda birinshi ret uıymdastyrylyp otyr. Bizdiń kəsipkerlerdiń jergilikti bastamalardy qarjylaı qoldaýǵa daıyn ekenderi qýantady. Bıznes ıeleri Elbasynyń "Bolashaqqa baǵdar: rýhanı jańǵyrý" baǵdarlamalyq maqalasyn basshylyqqa alǵandaryn aıtady. Oblystyq jaýyngerlik óner federasııalary túrli memleketterdegi qarsylastaryn shaqyrýǵa úlken úles qosty. Hedlaınerler men juldyzdy qonaqtardy demeýshilik qarajat esebinen tarttyq. Kəsipkerlerdiń kómegi, sharaǵa halyqtyń kóp jınalǵany Atyraýdyń jaqyn bolashaqta Qazaqstan sportynyń astanasy bolýy múmkin ekenin ańǵartady, osy maqsatqa jetý úshin biz de bar kúshimizdi salamyz.
Atyraýlyq sportshylarǵa jankúıer bolýǵa 2,5 myń adam jınaldy. Kórermenniń jartysy festıvaldi Muz saraıynda tamashalasa, qalǵandaryna kóshede LED ekran arqyly tikeleı kórsetilim uıymdastyryldy.
Atyraý oblysynyń sportshylary jankúıerlerin jerge qaratpady - 16 jekpe-jektiń bərinde jeńiske jetti. MMA boıynsha kezdesýdiń fınaldyq jarysynda atyraýlyq Isataı Temirov Brazılııadan kelgen qarsylasy Fortýnato Lapany nokaýtpen jeńip, kórermen qoshemetine ıe boldy.
MMA, dzıýdo, sambo, jaýyngerlik sambo, taekvondo, jekpe-jek, WKF karate, boks, kıkboksıng, taı boksy, pankrıatıon, grek-rım kúresi, djıý djıtsý, kıokýshınkaı karate, erkin kúres jəne basqa da jekpe-jektiń 16 túrinen bolatyn jarysta Atyraý oblysynyń eń úzdik sportshylary alys-jaqyn shetelderden keletin qarsylastarymen synǵa tústi.
Munaıly aımaqqa Ýkraına, Reseı, Grýzııa, Əzerbaıjan, Brazılııa, Koreıa, Túrkııa, Ispanııa, Taıland, Polsha, Belgııa, Iran, Marokko sekildi 16 memleketten sportshylar keldi.
Baqytgúl Babash,
«Egemen Qazaqstan»