"Týǵan jerge, aýyl-aýylǵa nemquraıly qaramaý kerek. Týǵan jerdiń árbir topyraǵy, árbir ósimdigi, árbir qumyrsqasy biz úshin óte qymbat. Otandy súıý - elińdi súıý degennen bastalady. Osyǵan baılanysty Qazaqstannyń kıeli jerleri dep otyrmyz. Parıjge barsań, Napoleonnyń jatqany jerin kórsetedi, óziniń tarıhyn, Eıfel munarasyn kórsetedi, al Ispanııaǵa barsań óziniń burynǵy astanasyn kórsetedi, taý-sýlaryn kórsetedi. Sol sııaqty ár eldiń bir nysandary bar. Qazaqstan da eshkimnen kem emes. Bizdiń de kıeli jerlerimiz bar", - dedi Qazaqstan Prezıdenti.
Sonymen qatar, Nazarbaev eldiń ár jerindegi nazar aýdararlyq muralarymyzdy sanamalap berdi.
Kıeli jer degende ata-babalardyń molasyn, mazaryn aıtýdyń qajeti joq. "Bizdiń qazaq oǵan da túsip ketedi. Kıeli jer degen qazaqtyń óziniń biletin jerleri, esinde saqtap, ekinshi sol turatyn aýdannyń, oblystyń jerleri, úshinshi, dúnıe júzine belgili nysandar. Endi osyǵan keleıik, bizdiń esimizge á degende ne túsedi? Qoja Ahmet Iаssaýıdiń kesenesi túsedi. Arystan bab túsedi. Batys Qazaqstandy aıtsaq, murajaı sııaqty bolyp jatqan dalasy esimizge túsedi. Atyraýdy aıtsaq, baıaǵy Altyn Ordanyń Jaıyqtyń boıynda jatqan handary esimizge túsedi. Ortalyq Qazaqstandy aıtsaq, "Ulytaý", qazaqtyń handary jınalǵan jeri. Shyǵysqa barsaq, saq zamanynan bergi qazba qundylyqtary dúnıe júzine belgili bolyp kele jatyr. Ońtústikke barsaq, altyn adamnyń shyqqan jerleri... Sondaı-sondaı, dúnıe júzine kórsetetin kıeli jerler bar, ózimizdiń kıeli jerler bar. Olar ne úshin kerek? Ol ishki týrızmdi aldymenen damytý", - deıdi Elbasy.
Nazarbaev qazirgi kezde shetelge baryp demalǵysy kelmeıtinin aıtty. Onyń pikirinshe, Býrabaıǵa jeter ásem jer joq.
"Qazir keńdik bolǵannan keıin jer sharyn sharqyp, anda baramyz, munda baramyz, demalysqa anda da, munda da ketemiz. Bir qazaqtan "Qazaqstannyń barlyq jerin aralap shyqtyń ba" dep surap kórseń, ondaı az. Mysaly men osy jyldardyń ishinde Qazaqstannyń men barmaǵan túkpiri joq dep men aıta alamyn. 7500 aýyldyń bárinde bolmaǵan shyǵarmyn. Al 165 aýdanyń bárinde bolǵan shyǵarmyn. Men dúnıedegi adamdar demalatyn jerlerdi kórip shyqqan adammyn. Kele jatqan urpaqqa da, zamandastaryma da aıta alamyn. Men qazir eshqaıda barǵym kelmeıdi demalysqa. Qazir Býrabaıda otyrmyz, mundaı keremet jerdi esh jerde kórmeısiń osy kúni. Tabıǵaty saqtalǵan, ádemi, jerdiń jánnaty sııaqty. Kóli de bar, taýy da bar, sýy da bar. Dál osylaı Shyǵys Qazaqstanǵa barsań, adamnyń aıaǵy baspaǵan. Ertistiń sýynyń seksen paıyzy ózimizdiń ózenderden qurylatynyn árkim bile bermeıdi. Sol ózenderdiń barlyǵy sarqyrap, Ertiske quıylyp jatyr, ár ózenniń barlyǵy keremet, Alataýdyń baýraıy óz aldyna", - dedi Nazarbaev.