Kórmege memlekettik mýzeıdiń qorynda saqtaýly belgili ǵalymdardyń jeke keshenderi qoıylǵan. Onyń ishinde, Qazaqstan Ǵylym akademııasynyń negizin qalaýshy, elimizdegi geologııalyq ınstıtýtyn qurýǵa belsene aralasqan akademık Qanysh Sátbaevtyń, etnoarheolog, shyǵystanýshy, tarıhshy-ǵalym Álkeı Marǵulannyń jeke buıymdary kelýshiler nazaryna usynylyp otyr. Bul kórmeniń kelesi ekspozısııasy kezinde Esik obasynan tabylǵan «Altyn adamdy» zertteýshi, Qazaqstan Memlekettik syılyǵynyń laýreaty, tarıh ǵylymdarynyń doktory Kemel Aqyshevtiń, etnograf, arheolog, tarıh ǵylymdarynyń doktory professor, Qazaqstan halyqtary sharýashylyq mádenıeti men turmysyn tııanaqty túrde baıandaıtyn kóptegen ǵylymı-tanymdyq monografııalardyń avtory Halel Arǵynbaevtyń jeke keshenderi quraıdy.
Sondaı-aq, kórmede alǵashqy ǵalym áıel – paleontolog, paleozoolog, bıologııa ǵylymynyń kandıdaty, Reseı Paleontologııa qoǵamynyń qurmetti múshesi B.S. Qojamqulovanyń fotoqujattary qoıylǵan.
Kórmeniń «Táýelsiz Qazaqstannyń ǵalymdary – akademıkter» dep atalatyn ekinshi bólimi akademıkter S.Z. Zımanov, M.H. Asylbekov, J.Q.Qasymbaev, M.Q.Qozybaev, A.Q.Qoshanov, E.E.Erǵojın jáne basqa ǵalymdardyń jeke keshenderine arnalǵan. Bul bólim Qazaqstannyń zań ǵylymdarynyń bastaýynda turǵan, zańgerlik bilimniń damýyna zor úles qosqan, 200-den asa ǵylymı eńbektiń, onyń ishinde 12 monografııanyń avtory, akademık S.Z. Zımanovqa arnalǵan ekspozısııadan bastalady.
Táýelsizdik jyldary Qoǵamdyq ǵylymdar salasyndaǵy qazaqtardyń etnıkalyq aýmaǵyn qalyptastyrý jáne qazaq memlekettiginiń tarıhy men máseleleriniń zerttelgeni maqtanarlyq jaǵdaı.
Elbasy Nursultan Nazarbaevtyń «Bolashaqqa baǵdar; rýhanı jańǵyrý» baǵdarlamalyq maqalasynyń «Bilimniń saltanat qurýy» degen bóliminde «Bilimdi, kózi ashyq, kókiregi oıaý bolýǵa umtylý – bizdiń qanymyzda bar qasıet» dep kórsetken bolatyn. Jastar úshin bilim qashanda kerek qasıet. Kórmede qoıylǵan árbir zat jastarǵa erteń qajettigimen qundy ekendigin túısinesiz.
Saparbaı PARMANQUL,
«Egemen Qazaqstan»
ALMATY