Ejelgi Taraz tórinde qalyptasqan dástúr boıynsha aýdan ónerpazdarynyń konserti ótip keledi. Osy ýaqytqa deıin Sarysý, Jýaly jáne Shý aýdandarynyń ónerpazdary áýlıeatalyqtardy ásem ánmen terbep, kórkem kúımen qýantqan bolatyn. Halyq ta aýyl ónerpazdarynyń ónerine tánti bolyp, rızashylyqtaryn bildirgen edi.
Osy oraıda, jýyrda ǵana Taraz qalasyndaǵy «Tórtkúl» kerýen saraıynda Moıynqum aýdany ónerpazdarynyń «Moıynqumnyń dalasy men áýeni» atty dýmandy-sazdy konserti bolyp ótti.
Atalǵan shara Moıynqum án-bı ansambliniń oryndaýynda kúı atasy – Qurmanǵazynyń «Balbyraýyn» týyndysymen ashyldy. Sondaı-aq, konsert barysynda «Qarlyǵash» bı toby jáne Jámıla Omarova, Erlan Aıtqabyl syndy talant ıeleri óz ónerimen kópshiliktiń kóńilinen shyqty. Áýelete salǵan án men myń burala bılegen bı de qazaq óneriniń qudiretin elge taǵy bir tanytqandaı edi.
Al moıynqumdyqtardyń ónerin tamashalaýǵa kelgen kópshilik ashyq aspan astyndaǵy Jazylbek Qýanyshbaev atyndaǵy murajaı jáne aýdandyq ortalyqtandyrylǵan kitaphana kórmesimen tanysty. Bul jerde de aty ańyzǵa aınalǵan ataqty shopannyń ótken ómir joly men eńbek joly keremet úılesim taýyp, kópshilikke jaqsy áser syılady.
Atalǵan dýmandy kesh oblystyq mádenıet, arhıvter jáne qujattama basqarmasynyń uıymdastyrýymen EKSPO-2017 halyqaralyq kórmesi aıasynda ótkizildi. El ishindegi talanttardy elge tanytý maqsatynda qolǵa alynyp kele jatqan mundaı dýmandy keshter qyrkúıek aıynyń ortasyna deıin «Tórtkúl» kerýen saraıynda jalǵasyn tabatyn bolady.
Kelesi aptada qala turǵyndary men qonaqtary Qordaı aýdany ónerpazdarynyń konsertin tamashalamaq.
Hamıt ESAMAN, «Egemen Qazaqstan»
Jambyl oblysy