«Stansaǵa poıyz toqtaıdy» degennen-aq onda turatyn temirjolshylar máre-sáre bolyp qalady. Bul poıyz kúndelikti árli-berli ótip jatatyn jolaýshylar nemese júk poıyzy emes, «Salamatty Qazaqstan» poıyzy. Kovylnaıa stansasyna poıyz toqtaıdy degennen Orynbasar Qalybaeva apaıdyń da qýanyshynda shek bolmady. Jumysta júrgende ortalyqqa baryp, densaýlyǵyn teksertýdiń bir sáti kele qoımady. Qazir zeınet demalysynda bolsa da, kúndelikti tirshilik qamy, mal bar, jan bar degendeı, úıden shyǵa almaıdy. Qostanaıǵa barsa, ár dárigerdiń esigin qaǵyp júrgende, birneshe kún jatyp qalady. Al «Salamatty Qazaqstan» po-ıyzynda dárigerler sút pisirim ýaqytta adamdardy tyńdap, túrli apparattarymen tekserip, emin jazyp berip te úlgeredi. Orynbasar Serikjanqyzy da «Salamatty Qazaqstan» poıyzyndaǵy dárigerlerdiń barlyǵyna qaraldy, ish qurylysyn apparattarǵa túsirdi, mazalaıtyn aýrýyn aıtty. Dárigerleri qandaı bilikti, qarapaıym, kishipeıil deseıshi. Mazalaıtyn naýqasyna baılanysty Orynbasar Qalybaevany nevropatolog dáriger Gúlnar Ibentaeva qabyldap, osteohondroz aýrýynyń neden bolatynyn, odan qalaı emdelý kerektigin, qandaı dáriler qabyldaý qajettigin túsindirdi.
– «Salamatty Qazaqstan» poıyzynyń dárigerlerine óte rızamyn. Gúlnar Shabalıqyzynyń biliktiligine, qarapaıym mádenıettiligine alǵysym sheksiz. Rasyn aıtsam, stansa bir búıirde jatqandyqtan, sonaý aýdan ortalyǵyna, Qostanaıǵa bara beretin múmkindigimiz az. Dárigerdiń aıtqan emin jasaımyn, ázir aýrýhanaǵa jatýǵa qajettilik joq ekenin túsindirdi, – dep rızashylyǵyn bildirdi O.Qalybaeva. Oǵan poıyzdyń toqtaıtynyn estip kelip turǵan Berik Baqytjanov ta qosyldy.
– Aýyldaǵylarǵa osylaı kóńil bólip otyrǵan Elbasyna, Úkimetimizge rızamyz. Aýyl shalǵaı bolǵandyqtan bas aýyryp, baltyr syzdasa da júgirip ortalyqqa bara bermeımiz. Aldaǵy ýaqytta «Salamatty Qazaqstan» poıyzy shalǵaıdaǵy eldi mekenderdi barynsha kóp qamtysa degen tilek bar, – dedi Berik Aıtbaıuly.
Poıyzda gınekolog, nevropatolog, kardıolog, hırýrg, oftalmolog, pedıatr, otolarıngolog, stomatolog, rentgenolog, endoskopıst, ÝZI sekildi on bes maman bar.
– Bizdiń aýrýhana mamandary mamandandyrylǵan áleýmettik poıyzdar jumysyna jyl saıyn qatysyp júr. Tájirıbesi mol, bilikti mamandar qyzmetine turǵyndar rıza. Dárigerler poıyzda demalyssyz jumys isteıdi, olar temirjolshylar men shalǵaı aýyldardyń turǵyndaryn kóbirek qamtýdy basty maqsaty etip otyr. Medısınalyq kómektiń barlyǵy aqysyz kórsetiledi. О́ziniń densaýlyǵy úshin alańdaıtyn, biraq oblys ortalyǵyndaǵy emhanalarǵa barýǵa múmkindigi joq azamattar tekserilýine, dárigerlerge ózin tolǵandyrǵan suraqtar qoıýyna bolady, – deıdi Qostanaı temir jol aýrýhanasy bas dárigeriniń orynbasary Márzııa Esqazına.
Názıra JÁRIMBET, «Egemen Qazaqstan» QOSTANAI