22 qyrkúıekte Astanada áleýmettik qyzmetkerlerdiń alǵashqy qazaqstandyq forýmy ótedi. Bul týraly Aqtóbe oblysynyń jumyspen qamtý jáne áleýmettik baǵdarlamalar basqarmasynyń basshysy Qaırat Otarov «Aqtóbe aqparat» aqparattyq ortalyǵynda ótkizgen baspasóz máslıhatynda habarlady.
Forýmnyń maqsaty - áleýmettik qorǵaý salasynda jınaqtalǵan tájirıbeni taldap qorytý jáne salanyń negizgi baǵdaryn anyqtaý. Sharanyń uıymdastyrýshysy - BUU, IýNISEF damytý baǵdarlamalarynyń, Kóshi-qon boıynsha halyqaralyq uıymynyń, EQYU, BUU, Halyqaralyq túrme reformasynyń qoldaýymen QR Eńbek jáne halyqty áleýmettik qorǵaý mınstrligi.
Forýmǵa 600-deı adam keledi: Olardyń arasynda Ulybrıtanııa, Serbııa, Horvatııa, Chehııa, Reseı, Grýzııa elderiniń halyqaralyq sarapshylary bar.
Sharaǵa QR Parlamentiniń, Úkimetiniń, ortalyq jáne jergilikti atqarýshy organdardyń, oqý oryndary men úkimettik emes uıymdardyń ókilderi qatysady. Praktık mamandar, ǵalymdar, qoǵamdyq jáne saıası qaıratkerler óńirdiń erekshelikterin eskere otyryp, áleýmettik jumystyń damý múmkindigi men ereksheligin talqylaıdy, múgedektigi bar tulǵalarǵa, qarttarǵa, úısizderge, turmystyq qysymnyń qurbandaryna, adam saýdasynyń qurbandaryna kásibı kómek berýdegi zamanaýı tehnologııalarǵa nazar aýdarady.
Túrme salasyndaǵy áleýmettik jumysty damytýdyń tájirıbesi men keleshegin, densaýlyq saqtaý, jańa tehnologııalar men áleýmettik saıasatty júzege asyrýdaǵy vedomstvoaralyq jáne sektoraralyq ózara áreket etýdi talqylaý josparda bar.
Birinshi forým barysynda áleýmettik saladaǵy menedjement, áleýmettik qyzmetkerlerdi daıyndaý jáne olardyń biliktiligin arttyrý, kommersııalyq emes uıymdardyń arnaıy áleýmettik kómek kórsetýge qatysýyn keńeıtý, volonterlik pen qaıyrymdylyqty qoldaý sekildi ózekti máseleler talqylanady dep kútilýde.
Forým aıasynda «Qazaqstanda júzege asyrylatyn úzdik áleýmettik jobalar» atty besinshi mereıtoılyq respýblıkalyq kórme men «Áleýmettik aýdarymdar - jumyspen qamtylǵan halyqqa adekvatty áleýmetti tólemderdi qamtamasyz etý» semınary ótedi.
Forým jańa baılanystardy ornatý, jańa ıdeıalar men áleýmettik jumysty jańǵyrtýdyń baǵyttaryn, áleýmettik salany ári qaraıǵy ınnovasııalyq damytý maqsatynda tıimdi sheshimderdi izdeý, Qazaqstan halqyna usynylatyn áleýmettik qyzmetterdiń sapasy men qol jetimdiligin arttyrý máselelerin qarastyrady.